Mga Alahas Ni Cornelin
Sa isaeang ka syudad it Crete, sakop it banwang Greece, may isaeang ka babayeng baeo. Ro anang pangaean hay si Cornelin.
May daywang ka onga nga inaywan kana ro anang nagtaliwan nga asawa. Puro eaeaki ro anang onga ag malinong sandang nagapangabuhi ko anang daywang ka onga nga eaeaki.
Isaeang adlaw, may nagbisita sa andang baeay, ro ana anay nga kaklase nga babaye. Manggaranon rondayang babaye ag haeos putos it alahas ro anang eawas halin sa oeo hasta sa siki. Pagkatapos it mahabang kamustahan, guin usoy ko anang kaklase ro mga alahas ni Cornelin. Ona abi sa andang lugar hay ordinaryo nga guina suksok ro mga alahas maskin una sanda sa sueod ko andang panimaeay, tongod raya rong sukatan kong andang pagkatawo kon manggaranon imaw o pobre.
"Siin tana ro imo ngatong mga alahas nga guin suksok mo katong magkaklase pa kita? Pangutanan ko anang amiga.
"Idto sa sueod, akon nga guinatago!" sabat man ni Cornelin.
"Bue-a baea idto ay gusto ko nga makita", pilit ko bisita.
Agod matapos rong pagpamilit ko anang amiga, sumueod imaw sa sueod. Pag guwa nana, guina agbay eon nana ro anang daywang ka onga nga eaeaki.
"Hayra, ro akong mga alahas. Sobra pa sanda sa bueawan ag dyamante. Guin pabahoe ko sanda nga matinumanon, mahugod ag naga respeto sa magueang. Ratong akon nga mga alahas hay guin baligya ko agod ipa boeong sa akong asawa. Sa owa it swerte, hay namatay imaw ag inaywan nana kakon ro daywang ka onga nga sobra pa sa manggad.
Owa nakahambae sa kangawa rong anang bisita. Nahikaw imaw kay Cornelin tongod owa imaw it onga. Mabuhay eon sanda nga nagakabuhi ko anang asawa apang owa gid sanda gin swerte nga maka onga.
Nag uli imaw (ro amiga) nga may kalipay ro anang tagipusuon tongod naka pabugtaw kana rong kabuhi ni Cornelin.
Huo, ngani putos imaw it maeahaeon nga alahas ogaling maeamig rong mga alahas ag owa it kabuhi nga mabatyagan nga naga putos sa anang kaeawasan. Rong mga onga nga mabuot, mapagmahae ag madinumdumon hay may maga tao it kabuhi sa andang mga guinikanan. Si Cornilin hay nakasiguro nga sa anang pag eoya hay may maga guyod ag maga tatap kana sa tanan nga oras. /MP mailto:madyaas_pen@yahoo.com
No comments:
Post a Comment