Sugilanon Ni Tita Linda

Tita Linda Belayro

Ro Ermitanyo

Sa isaeang ka mataas nga bukid, maeayo pa sa kabihasnan hay may unang naga estar nga isaeang ka ermitanyo. Kada ngani magpanaog imaw sa datag hay naga-abot dayon ro kalamidad. Busa, indi guid malipatan it mga tawo nga kada panaog kong ermitanyo, segurado guid nga may maabot nga bagyo ag bahâ.
Sa kamatu-uran, nagapanaog ro ermitanyo agod paandaman ag pa preparahon pa ro mga tawo sa paea-abuton nga kalamidad. Oeayhon man nga naga panindahan imaw ko anang mga kinahangeanon. Ogaling imbis nga magpasaeamat kana ro mga tawo, guin kontra pa imaw ag guinahaboy pa it bato tongod saeot kuno imaw nga nagadaea it dimalas. Owa guid imaw naga baeos bisan ano kana ro pagtamuylaw. Para makalikaw sa kaakig it mga tawo, naga dali-dali permi imaw nga naga panaw. Idto imaw naga panago sa isaeang ka baeay it baeo nga babaye kun mag agto sa datag.
Naeo-oy kana ro babaye tag nag adto imaw. Ngani guinpa kaon imaw it saging nga habilin nanda sa pamahaw. Naghambae kana ro ermitanyo nga mag adto sa mataas nga lugar ag indi anay magbalik sa datag it mga daywang adlaw.
Guin sugo sanda nga magdaea it mga gamit ag pagkaon para sa sueod it daywang adlaw, magdaea man it maskin nano nga makatabon kanda sa uean. Guin bilinan pa imaw nga patun-on man ro ibang kasimaryo.
Nag preparar rong babaye. Nagsugid man imaw sa iba ogaling owa pag patihi imaw. Umabot rong adlaw nga umuean. Dali-dali nga naghalin rong mag-ina ag mag-adto sa mata-as nga lugar. Amat-amat nga nagdaeom rong tubi. Bumahâ it madaeum sa andang lugar hasta guin eapawan ro ibang manaba nga pamaeay. Puro singgit it tabang ro mabatian sa palibot. Masueog rong tubi ngani abô nga baeay rong inanod.
Sa sueod it daywang adlaw ag daywang gabi-i, abong ginutom ag abô man nga naeomos. Nadumduman nanda rong ermitanyo. Kon namati eamang sanda hay naka preparar kunta sanda.
Samtang ro mag-ina hay mayad mat-a ro andang kahimtangan idto sa ibabaw it bukid. Pagkataliwan it ikatlong adlaw, owa eon it hangin ag bahâ. Nanaog sanda. Hangawa sanda nga owa guid it samad ro andang baeay, maskin ro andang mga igdaeapat. Nagpasaeamat sanda sa Diyos nga paagi sa ermitanyo nga Diyosnanon, guin salbar sanda sa kalamidad. /MP