Tita Linda Belayro
Dama de Noche
(Lady of the Night)
Pinasahe sa tanan rayang bueak nga Dama de Noche bangud sa gabi-i ra imaw naga sabwag ko anang kahumot. Kon adlaw, kipô tanan ro anang bueak nga matsa naga katueog. Kon ham-an it guin hingaeanan ra it Dama de Noche hay tongod sa isaeang ka historya it paghigugma nga nakalikum sa tanan.
Senia ro pangaean ko rayang babaye nga taga Uma. Mahipos, mahugod ag relihiyosa nga daeaga. Kada agahon, idto imaw nagatener sa anang hardin nga puno it mga kabueakan. Masaka eamang imaw sa baeay kon oras eon it ilabas. Pagka kaon, dayon manaog man imaw hasta matunod ro adlaw. Idto imaw naga pangadi sa anang hardin parabil magsaka sa baeay.
Isaeang adlaw, may nag-taeang nga sangka soldado sa andang lugar. Gwapo, may tipo ag maatag rayang soldado. Nangayo imaw it tubi sa daeaga. Guintaw-an man imaw eagi it tubi ko daeaga. Halin kato, permi eon nga naga pamasyar kana rong soldado. Pagkasayod ko anang ama ag ina, guin bawaean imaw sa pag mangin maeapit sa soldado bangud owa nanda makilaea it mayad rayang eaeaki. Ogaling nahueog ro bu-ot it daeaga sa eaeaki. Kada oli it soldado, naga pangayo imaw it bueak sa daeaga agod ita-o kuno sa anang ina. Ogaling, sa kamatuuran, rayang bueak hay guinadaea man nana sa ibang babaye idto sa pihak nga baryo. Ko olihi, hasayran ko anang ama ro kamatuoran nga bukon eamang it anang onga nga daeaga ro guina pangasawa ko rayang soldado. Agud mapundo ro pagkita perme ko daywa, guin preso ro daeaga sa anang kwarto. Tongod kara, napundo eon ro pagkita ko rayang soldado sa daeaga. Bangud kara, owa magkaon-kaon ro daeaga halin kato. Ko sangka gabi-i ngaron, nag-abot ro soldado ag sumaka sa isaeang ka tanum nga naga kamoy sa baeay. Sa rayang paagi, naka sueod imaw sa kwarto it daeaga. Bu-ot nana nga takawon ro daeaga, ogaling hay naabtan sanda ko anang ama. Sa kaakig ko anang ama, guin eabô nana ro soldado. Golpi mang pumatunga ro babaye busa imaw ro hatama-an ko ratong sandukô. Namatay ro daeaga ag nakadaeagan ro soldado.
Abu gid ro kasubo ko anang ama. Guin eobong nanda ro daeaga sa tunga ko anang hardin. Makataliwan ro mga inadlaw, may tanum nga tumubo runa sa anang eo-eobngan. Nagta-as rayang tanum, nagkamoy maeapit sa bintana ko kwarto it daeaga, hasta nga nagbueak. Kahumot ro bueak nga naga sabwag sa kagab-ihon, ogaling kon adlaw naga takup ro bueak. Nadumduman ko anang ama ro anang onga nga si Senia. Ro anang pagkamoy hay pareho it pagsaka ko soldado sa bintana ko daeaga ag ro kahumot imaw ro daeaga nga magakita sanda ko gabi-i ngaron.
Tongod owa man makilaea it mayad ko mga taga Uma si Senia, rondayang tanum hay guin tawag nanda nga Dama de Noche o Lady of the Night tongod sa gabii eamang ra naga sabwag ko anang kahumot. /MP
Senia ro pangaean ko rayang babaye nga taga Uma. Mahipos, mahugod ag relihiyosa nga daeaga. Kada agahon, idto imaw nagatener sa anang hardin nga puno it mga kabueakan. Masaka eamang imaw sa baeay kon oras eon it ilabas. Pagka kaon, dayon manaog man imaw hasta matunod ro adlaw. Idto imaw naga pangadi sa anang hardin parabil magsaka sa baeay.
Isaeang adlaw, may nag-taeang nga sangka soldado sa andang lugar. Gwapo, may tipo ag maatag rayang soldado. Nangayo imaw it tubi sa daeaga. Guintaw-an man imaw eagi it tubi ko daeaga. Halin kato, permi eon nga naga pamasyar kana rong soldado. Pagkasayod ko anang ama ag ina, guin bawaean imaw sa pag mangin maeapit sa soldado bangud owa nanda makilaea it mayad rayang eaeaki. Ogaling nahueog ro bu-ot it daeaga sa eaeaki. Kada oli it soldado, naga pangayo imaw it bueak sa daeaga agod ita-o kuno sa anang ina. Ogaling, sa kamatuuran, rayang bueak hay guinadaea man nana sa ibang babaye idto sa pihak nga baryo. Ko olihi, hasayran ko anang ama ro kamatuoran nga bukon eamang it anang onga nga daeaga ro guina pangasawa ko rayang soldado. Agud mapundo ro pagkita perme ko daywa, guin preso ro daeaga sa anang kwarto. Tongod kara, napundo eon ro pagkita ko rayang soldado sa daeaga. Bangud kara, owa magkaon-kaon ro daeaga halin kato. Ko sangka gabi-i ngaron, nag-abot ro soldado ag sumaka sa isaeang ka tanum nga naga kamoy sa baeay. Sa rayang paagi, naka sueod imaw sa kwarto it daeaga. Bu-ot nana nga takawon ro daeaga, ogaling hay naabtan sanda ko anang ama. Sa kaakig ko anang ama, guin eabô nana ro soldado. Golpi mang pumatunga ro babaye busa imaw ro hatama-an ko ratong sandukô. Namatay ro daeaga ag nakadaeagan ro soldado.
Abu gid ro kasubo ko anang ama. Guin eobong nanda ro daeaga sa tunga ko anang hardin. Makataliwan ro mga inadlaw, may tanum nga tumubo runa sa anang eo-eobngan. Nagta-as rayang tanum, nagkamoy maeapit sa bintana ko kwarto it daeaga, hasta nga nagbueak. Kahumot ro bueak nga naga sabwag sa kagab-ihon, ogaling kon adlaw naga takup ro bueak. Nadumduman ko anang ama ro anang onga nga si Senia. Ro anang pagkamoy hay pareho it pagsaka ko soldado sa bintana ko daeaga ag ro kahumot imaw ro daeaga nga magakita sanda ko gabi-i ngaron.
Tongod owa man makilaea it mayad ko mga taga Uma si Senia, rondayang tanum hay guin tawag nanda nga Dama de Noche o Lady of the Night tongod sa gabii eamang ra naga sabwag ko anang kahumot. /MP
No comments:
Post a Comment