Sa Kilid It Suba It Akean

Ni Ronquillo C. Tolentino

Ro Kalisud Sa Atong Kabuhi

Mapaead eon gui-ato ro tawo nga owa naka-agi it kalisud sa anang pag-pangabuhi. O kon indi, imaw hay sangka pina eabi.
Ay ro aton nga kalibutan nga ginahueagan hay may madangat guid nga kalisud. Busa ginatawag kon amat nga duta nga luha-an.
Ro kalisud sa pagpangabuhi hay na manifestar ginapakita kon amat paagi sa guera, pa-agi sa gutom, sa crisis economico, sa pagtaliwan sa pihak nga kalibutan it aton nga hinigugma ag iba pa nga klase it pagpangalisud.
Ro kalisud hay indi malikawan, panan-awon naton nga royon hay parte it pagpangabuhi.
Ro kalisud naton sa pagpangabuhi hay indi naton pagdaehon sa atong paino-ino. Indi naton pag ibutang nga ro kalisud hay naga buyo pa katon sa pagpaino ino it bukon it mayad.
Ro kalisud hay aton nga panan-awon nga it sa medyo pagsamit kon man-o naton hibatas o hipangatubang ro kalisud. Ro kalisud, busa ngani, hay sukat sa tawo. Ginasukat imaw kon hasta si-in guid ro anang kapag-on, kon man-o imaw makapangatubang ag makadaea it kalisud.
Ro kalisud kon amat hay may mayad man nga nadangat . Ay ro tawo nga naga kalisud hay kon amat nagapaninguha nga hieampawan nana ro kalisud.
Ro Tawo Maga-Expectar It Kapaltahan
Sa aton nga pagpangabuhi, maga-expectar kita nga ro tawo hay may kapaltahan – sa aton nga pag-obra, pag-decision, pagdumaea, pagpanueat o paghambae – kon amat may aton nga kapaltahan.
Dagaya nga tawo ro owa nagabuhat it decisyon o naga-entra sa mga bagay-bagay nga konta dapat sanda nga mag participar tongod sa kahadlok nanda nga hi criticar sanda it anda nga kapaltahan. Ro mga tawo nga makara hay medyo sa hanunga o sa English pa hay sa "neither-nor" class. Mawra ro mga tawo nga sa clase it maeaba-ab nga nagsunod kay Kristo pero bukon it sa devosyon sa kawsa kundi sa kahikaw ag kahadlok kon anano ro pagpaino-ino kanda it tawo.
Ro kalibutan hay puno it nagasura. Mana man ron sa eanas it hampang atletico. Abo ro nagasura pero owa man sanda ngani makabuyot it bola. Owa man sanda makahampang. Pero owa sanda naka comitar it kapaltahan ay owa man sanda naga samit kon mauno ro maghampang. Sa mga manughampang ngara matan-awan ro mga naga buhat. May anda nga kapaltahan o naga comitar sanda it kapaltahan ay abo ro anda nga na-obra.
Si Ford anay sa pag-obra nana it premiro nana nga auto hay halipat it pagbutang it kaeambyahon sa pag-atras. Si Thomas Edison nga bantogan nga inventor hay nagastos anay it daywang milyones dolares sa invensyon nga owa man ngani it hayga.
Ro tawo nga owa it kapaltahan hay imaw man ro tawo nga owa it na obra nga bagay-bagay. Imaw ron ro nagapundo sa gulong it pagpa-uswag. Pero ro tawo nga owa it kapaltahan hay indi naton mahambae nga owa it kapaltahan, ay ro ana nga mabahoe nga kapaltahan hay sa ana nga owa it pagpaninguha ag sa ana nga pagsura it binuhatan ko iba. /MP