Sugilanon Ni Tita Linda

Ni Tita Linda Belayro

Pamana

Maeapit eon lang rong paskwa. Tanan nga mga tawo hay guina-paabot rayang okasyon. Eabi sa tanan ro mga onga guid ro nagahueat sa kalipay bangud sa mga regalo nga naga halin sa andang mga maninoy ag maninay.
Isaea si Elden sa mga nagahueat nga mga tawo kada paskwa. Ko isaeang dag-on nga nagtaliwan hay may habaton imaw nga regalo halin sa isaeang ka magueang nga naga estar sa mabahoe nga baeay una sa andang lugar. Ilo eon sa ina ag ama si Elden. Una imaw naga estar sa anang lola. Naga baligya imaw it tinoea nga guina tus-on ag gina libod sa mga baeay-baeay.
Sa anang paglinibot, naka-agi imaw sa royong baeay nga may naga estar nga babayeng magueang nga guina tawag imaw nga si Mama Mer. Raya ro tawag kana ko anang sueogo-on bilang anang ama. Halin kato, permi imaw nga naga agi sa royong baeay agod magbaligya it tinoea.
Pag-abot it paskwa, naka baton imaw it regalo kay Mama Mer. Isaeang ka bag-ong eambong, sapatos ag mga de lata. May eakip pa nga christmas card. Rong naka sueat, "Hueaton ko ikaw kada paskwa"… Love, Mama Mer.
Hakibot imaw ka’t tawgon imaw ko anang lola agud mag-ihapon. Pilang adlaw eon lang ag paskwa eon. Ogaling matsa owa eot-a it tawo nga naga estar sa mabahoe nga baeay. Owa eot-a nana napan-uhi nga serado eot-a ro "gate" sa prente. Maskin ro mga tanum sa hardin hay hapabay-an eot-a. Uma-bot ro kaadlawan it paskwa. Hakibot imaw nga mahayag ro baeay. Bukas ro pwertahan sa sueod it baeay. Pagsueod nana sa baeay, hakita nana ro isaeang ka mabahoe nga regalo sa idaeum it christmas tree nga may sueat ko anang pangaean.
Guin buksan na ro kahon nga may sueod nga eambong, alahas ag pahumot. Parehas ko nagtaliwan nga paskwa hay may eakip pa nga christmas card. Nakasueat sa card nga guina paadto imaw sa manager it bangko ag makipagkita kay Mr. Mallari. Nag adto imaw ag nakipag hambae. Suno sa manager, ro testamento nga guin aywan sa "vault" hay pagabuksan eamang kon mag-adto ro isaeang ka may daea nga sueat halin kay Mama Mer.
Guin pakita ni Elden ro christmas card. Guin buksan man ro "vault" agud basahon ro nakasaad. Suno sa testamento, ro mabahoe nga baeay eakip ro mga kagamitan hay guin pamana kay Elden agod tatapon pati ro mga tanum. Ro deposito sa bangko hay guin hueay kay Elden ag sa anang sueogo-on nga mabuhay man nag serbisyo kana.
Si Mama Mer hay nagmasakit it kanser ag nagpadaea imaw idto sa "Home for the Aged" agud idto nana hueaton ro anang kamatayon. Tungod nga owa man imaw it mga guinikanan ag mga igbata, nagpaobra eagi imaw it testamento agod maaywan sa mayad nga alima ro anang guin pundar nga manggad. Ka’t makilaea nana si Elden hakita nana nga mabuot, mahugod ag mapinalanggaon si Elden sa anang Lola.
Pagkapirma ni Elden ko mga papeles it bangko, umuli sanda agod mag-estar sa mabahoe nga baeay. Maeapit eon man ro paskwa ag guin promisa nana nga maga pakaon imaw sa mga pobreng mga onga sa andang lugar agod makasamit man ro iba sa anang habaton nga regalo. /MP