Ni Tita Linda Belayro
Ro Alahas It Monte Carlo
Monte Carlo, isaeang ka parte it siyudad sa Monaco, kilaea nga sentro it sugaean. Raya nga siyudad hay guina pangayaw it mga sugaroe sa bilog nga kalibutan. Guina patihan nga owa it gabi-i una sa Monte Carlo bangud sa sueod it mga kasino hay bugtaw tanan ro mga tawo nga nagasinugae . Mahayag ro iwag nga matsa adlaw
Owa it eabot sa sugae, may guina pangayaw pa ro mga tawo. Ro pinaka mabahoe nga dyamante nga ginsueod sa isaeang ka saeaming nga kaha nga indi matakaw o mabasag man maskin anong klaseng armas ro gamiton. Mabahoe ro guina kita sa turismo ko Monte Carlo tongod sa rayang alahas. Kada dag-on sa kapistahan it Monte Carlo, may paindis-indis nga kon sin-o ro makabukas o makabasag sa kahang saeaming hay may mabahoe nga premyo nga pagabatunon. Libo-libo ro naga pangayaw sa Monte Carlo agud magsugae ag mag pasimpalad nga mabuksan ro kaha nga saeaming.
May sangka tawo, daea ro gamit bilang mekaniko, sige nana nga bae-bae ko kaha ogaling inayawan eang imaw. Sa anang kaakig ag kaga-oy, linampusan ko anang alima ro kilid it saeaming ag dayon nanampu-ayan. Owa it suko-suko, nawasak ro kaha ag hakibot ro tanan. Naghinugyaw ro mga tawo. Guin dayaw nanda si Kristoff nga mapaearon nga nagdaug. Ogaling, owa masayuri ni Kristoff kon ham-an nga nawasak nana ro kaha.
May isaeang ka eaeaki ro nag paeapit kana. Suno kana, ro nasambit nga kaha hay guin imbento it isaeang ka siyentista. Ro paghorma ko kaha hay guin eaha sa pinaka mainit ag pinaka maeamig nga temperatura. Busa maskin nanong armas ro gamiton hay indi madutlan. Ogaling sa pagtimpla ko saeaming hay may buea nga habilin nga owa mapan-uhi. Kon matama-an it sentro ro ratong may buea, mawasak ro bilog nga kaha. Raya ro "weakest point" ko saeaming. Sa pagkawasak ko saeaming, guin obrahan eon man it bag-o nga kaha ro alahas nga mas mapag-on. Hasta indi mawasak ro kaha, padayon nga guina pangayaw ro Monte Carlo ag naga padugang eon man it kita sa kaban ko gobyerno.
Leksyon: Guinatuead kita sa kaha nga saeaming. Abu katon nga maisog, mapag-on, mabakod ag may ikasarang sa tanan nga butang, ogaling may aton man nga mga kaeuya. Raya ro atong "weakest point" tuead ko kaeuya ko atong pagtuo sa Diyos, maila-on sa sobrang pagkaon, kaibog sa kalibutanong mga butang, bisyo, sugae, droga ag iba pa nga naga paeoya katon. Raya ro ginagamit ko atong kaaway agod kita patumbahon.
Normal eamang sa isaeang ka tawo nga may atong "kaeuya" bangud tawo eamang kita ag bukon it perpekto. Ogaling indi dapat nga ro atong kaeuya ro magdaea katon sa kapierdehan o pagkasamad sa atong pagkatawo. Ro atong kaeuya hay isaeang pagpadumdum nga sa pihak ko atong kaeuya hay may kaatubang nga pinakamabaskog nga puntos nga regalo it Diyos nga paga gamiton sa kamaeayran. Kilaeahon naton ro atong kaeuya. Indi naton pagpabay-an nga gamiton katon ro atong kaeuya para kita mapierde. Idangup naton sa Diyos ro atong kaeuya. Imaw eamang ro maka pabag-o sa aton nga kaeuya ag mabayluhan it kabakud ag kaisog segun sa anang kagustuhan. /MP
Owa it eabot sa sugae, may guina pangayaw pa ro mga tawo. Ro pinaka mabahoe nga dyamante nga ginsueod sa isaeang ka saeaming nga kaha nga indi matakaw o mabasag man maskin anong klaseng armas ro gamiton. Mabahoe ro guina kita sa turismo ko Monte Carlo tongod sa rayang alahas. Kada dag-on sa kapistahan it Monte Carlo, may paindis-indis nga kon sin-o ro makabukas o makabasag sa kahang saeaming hay may mabahoe nga premyo nga pagabatunon. Libo-libo ro naga pangayaw sa Monte Carlo agud magsugae ag mag pasimpalad nga mabuksan ro kaha nga saeaming.
May sangka tawo, daea ro gamit bilang mekaniko, sige nana nga bae-bae ko kaha ogaling inayawan eang imaw. Sa anang kaakig ag kaga-oy, linampusan ko anang alima ro kilid it saeaming ag dayon nanampu-ayan. Owa it suko-suko, nawasak ro kaha ag hakibot ro tanan. Naghinugyaw ro mga tawo. Guin dayaw nanda si Kristoff nga mapaearon nga nagdaug. Ogaling, owa masayuri ni Kristoff kon ham-an nga nawasak nana ro kaha.
May isaeang ka eaeaki ro nag paeapit kana. Suno kana, ro nasambit nga kaha hay guin imbento it isaeang ka siyentista. Ro paghorma ko kaha hay guin eaha sa pinaka mainit ag pinaka maeamig nga temperatura. Busa maskin nanong armas ro gamiton hay indi madutlan. Ogaling sa pagtimpla ko saeaming hay may buea nga habilin nga owa mapan-uhi. Kon matama-an it sentro ro ratong may buea, mawasak ro bilog nga kaha. Raya ro "weakest point" ko saeaming. Sa pagkawasak ko saeaming, guin obrahan eon man it bag-o nga kaha ro alahas nga mas mapag-on. Hasta indi mawasak ro kaha, padayon nga guina pangayaw ro Monte Carlo ag naga padugang eon man it kita sa kaban ko gobyerno.
Leksyon: Guinatuead kita sa kaha nga saeaming. Abu katon nga maisog, mapag-on, mabakod ag may ikasarang sa tanan nga butang, ogaling may aton man nga mga kaeuya. Raya ro atong "weakest point" tuead ko kaeuya ko atong pagtuo sa Diyos, maila-on sa sobrang pagkaon, kaibog sa kalibutanong mga butang, bisyo, sugae, droga ag iba pa nga naga paeoya katon. Raya ro ginagamit ko atong kaaway agod kita patumbahon.
Normal eamang sa isaeang ka tawo nga may atong "kaeuya" bangud tawo eamang kita ag bukon it perpekto. Ogaling indi dapat nga ro atong kaeuya ro magdaea katon sa kapierdehan o pagkasamad sa atong pagkatawo. Ro atong kaeuya hay isaeang pagpadumdum nga sa pihak ko atong kaeuya hay may kaatubang nga pinakamabaskog nga puntos nga regalo it Diyos nga paga gamiton sa kamaeayran. Kilaeahon naton ro atong kaeuya. Indi naton pagpabay-an nga gamiton katon ro atong kaeuya para kita mapierde. Idangup naton sa Diyos ro atong kaeuya. Imaw eamang ro maka pabag-o sa aton nga kaeuya ag mabayluhan it kabakud ag kaisog segun sa anang kagustuhan. /MP
No comments:
Post a Comment