Sugilanon Ni Tita Linda

Ni Tita Linda Belayro

Gilak

May isaeang ka manggaranon nga sobrang sueok. Haeos sakop nana eon ro bilog nga barangay ag tanan ro tawo hay may utang kana. Hilig gid nana ro magsuksok it nagagilak nga eambong. Bu-ot abe nana hay mapansin gid imaw bisan siin nga lugar. Owa man ra imaw naila it mahigko. Indi imaw maglamano bisan pa sin-o ay basi mahigku-an ro anang alima. Indi nana pagpapungku-an sa iba ro andang set ay basi maduea ro ka gilak. Hilig pa ko manggaranon nga ro magbyahe sa ibang lugar sakay ko andang yate. Nagbyahe sanda sa isaeang ka isla, owa pa sanda maka abot sa gin adtonan, inabot sanda it mabaskog nga bagyo. Kaibahan ko anang mga tripulante,namatay ro manggaranon pagka eonod ko yate. Tongod sa kadaeomon ko tubi, owa eagi masalbar ro mga sakay. Inabot it pilang buean parabil maeonip ro mga naeonod. Tag buksan ro kwarto nga guina toeogan ko mang-garanon, hakita ro puro eonot eon nga eawas ag toe-an eon lang ro habilin. Eonot man ro magilak nga eambong nga anang guinasuksok. Pareho man tanan nga toe-an ro mga tripulanteng pasahero, ngani indi makilaea ro kada isaea.
Leksyon: Owa it pinaeabi ro kamatayon. Manggaranon ka man o pobre, mapatay ro tawo tanan. Ro sadyaan nga eambong it sangkatawo, ro anang mapinong pamanit o katangos ko anang ilong hay maeonot man ag magabalik sa eapok nga atong guinhalinan. Ag ro masubo, ro anang mang-gad nga guintipon hay indi man nana madaea sa pihak nga kinabuhi. /MP