Sugilanon Ni Tita Linda

Ni Tita Linda Belayro

Tawong Estatwa

May mag-asawang owa guin grasyahe it onga. Sa kabuhayon eon nanda nga pag-iba, nag hambae ro babaye nga maskin nano eon lang conta basta imaw hay maka onga.
Isaeang adlaw, may hakita imaw nga isaeang ka babayeng estatwa. Naila-an guid ko babaye ratong estatwa ag maskin sa pagkaon, pagkatueog o pagpanaw hay daea-daea guid nana ro estatwa. Naakig ro eaeaki ay basi kuno mag estatwa ro andang onga.
Makataliwan ro siyam nga buean nga pag nabdos, nag – onga ro babaye. Isaeang ka gwapahon nga babaye ag owa man it deperensya, mayad ra eawas. Palangga guid it duro ko ina ro anang onga. Guina tao kana tanan ro anang gusto. Owa imaw guina patrabahuha ay basi maninahan ro anang mapinong pamanit. Guinapaligsan, guina hungit pa sa pagkaon ag permeng guina koe-koe. Nag bahoe ro onga nga mas nag gwapa pa guid ag guina kahikawan it tanan nga mga nanay.
Sa kabuhayan nga owa it gina inobra ko onga, nagmasakit. Guindaea nanda sa doctor. Suno sa doctor, kueang kuno sa ehersisyo.
Indi nana mabakyaw ro anang mga alima. Nagbakod ro mga tudlo, ag pati ro mga siki hay matsa robot kon magtikang. Nangin buhi imaw nga estatwa nga naga ginhawa ag naga kaon ogaling owa naga hueag.
Raya ro bunga it sobrang pag palangga. Guin tolerar ko ina ro katamaran ko anang onga. Ro sobrang pagpalangga ro nagapatay ko atong mga handum. Imbis nga ipa haum ro anang onga nga mangin sandigan ko anang paggueang, imaw pa ro sandigan ko anang onga maskin magueang eon. /MP