Sugilanon Ni Tita Linda

Ni Tita Linda Belayro

Romulus Ag Remus

Sa methologiya it Roma, bugana it mga estorya hanungod sa mga Diyos ag Diyosa. Tanan ro mga Diyos ag Diyosa hay naga estar sa bukid it Olympus. Sa ibabaw ko bukid, makikita ko mga Diyos ag Diyosa ro palibot nga kutob nasakupan ko kaharian it Olympus sa pagpamuno ni Haring Jupiter.
Isaea sa pinaka gwapong onga ni Jupiter hay imaw si Mars, ro Diyos it Giyera. Ma isog ag puerte kon maakig, ngani imaw ro gina padaea ni Haring Jupiter kon may away ro mga tawo nga gina apinan it mga Diyos ag Diyosa.
Sa isaeang ka kaharian nga guina pamunuan ni Reyna Vesta, (ro Reyna nga naga tatap ko sagrado nga kaeayo), nagbisita si Mars agod mangayo it sagrado nga kaeayo para sa isaeang ka giyera nga anang paga adtonan.
Ro sagrado nga kaeayo hay guina gwardyahan it mga "Vestal Virgin". Pitong ka mga Vestal Virgin ro naga bantay sa sagrado nga kaeayo ngato ag bawae kanda ro mag-asawa, maskin makipag sugilanon sa mga kaeaeakihan. Una sanda naga tener sa sueod kon siin una ro sagrado nga kaeayo.
Sa pagbisita ni Mars sa nasambit nga kaharian, hakita nana ro isaea sa mga Vestal Virgin ag nahueog ro anang buot kana. Rikara ro una nanda nga pagkita it sekreto, ag bangud may kinaadman ro hari, nag sige ro andang pagkita. Ko olihi, nagnabdos ro virgin. Sayod imaw nga paga patyon imaw kon masayuran ko palasyo o kon matukiban ro anang kahimtangan. Sekreto imaw nga nagpanaw, owa it nakasayod. Idto sa kagueangan, nag-onga imaw it kapid nga eaeaki ag guin pangaeanan nana kay Romulus ag Remus.
Agud malikaw imaw sa penalidad, guin abandonar nana ro daywang ka eapsag sa magka-eain nga lugar. Si Romulus hay hakita it nanay nga lobo ag si Remus hay hakita man it isaeang ka manggaranon. Nagbahoe sa lugar it mga hayop si Romulus.
Nabo-oe nana ro kasingkae it pamatasan ko mga lobo. Madasig imaw kon dumaeagan, ag maila nga malisod madakpan.
Samtang nagbahoe mat-a si Remus sa pinobre nga pangabuhi. Kapareho ko anang kakapid nga si Romulus, bu-ot nana nga makasamit it magarbo nga pangabuhi. Nag iba imaw sa grupo it mga mananambang nga naga abang ko mga karabana sa disyerto.
Makataliwan ro mga dinag-on, si Romulus hay nag adto sa siyudad agud magpasimpaead. May guin buligan imaw nga isaeang ka negosyante ag guindaea imaw sa lugar it negos-yante. Nangin bantay imaw sa mga kargamento ag nabantayan nana it husto tongod maabtik ro anang mga mata ag madasig kon magdaeagan.
Sige ro pagtiyog it kalibutan ag sa isaeang ka engkwentro, nagkita ro daywa ogaling owa magkakilaea. Tongod puro may handum sa kinabuhi ro kada isaea kanda, owa it may nagpatutos, nga ko olihi hapatay si Remus. Ko olihi, nangin haeambaeon ro pangaean ni Romulus, guin kilaea ro maisog nga soldado, ag guin taw-an it mataas nga posisyon sa kaharian. Sa anang kaabtik guin pundar nana ro Roma ko 753 parabil natawo si Kristo. Ro pangaean nga Roma hay halin sa pangaean ni Romulus. /MP