Sugilanon Ni Tita Linda

Ni Tita Linda Belayro

Hari It Bueawan

Maeayo ka pa sa palasyo ni Haring Ramas, makita eon nimo nga nagabanaag ro palasyo nga nahuman sa puro bueawan. Hilig ni Haring Ramas ro pagtipon it bueawan. Maskin nano basta bueawan, guinatubos gid nana. Ro anang eambong, sapatos, tanan ro anang gamit sa eawas halin sa oeo hasta dapa-dapa hay puro bueawan. Tanan man ro anang igdaeapat hay mga bueawan.
Si Haring Ramas hay may onga nga prinsesa. Kabaliskaran mat-a imaw sa anang ama bangud owa imaw it hilig sa bueawan. Abo ro naga pangasawa sa prinsesa ogaling indi sanda maka saka sa palasyo kon owa it daeang bueawan nga bagay. Isaea si Ramir sa naga pangasawa sa prinsesa. Sa tanan nga naga pangasawa, si Ramir ro maeapit sa anang tagipusuon. Tongod owa it madaeang regalo nga bueawan, owa makasaka ro binata. Idto eang imaw naga deretso sa baybayon agod maduea ro kasubo ko anang dughan. Samtang naga pamasyar si Ramir, may hakita imaw nga isaeang ka botelya nga naga eotaw-eotaw sa tubi. Anang guin pueot ag pahiling-hilingon, may mapa sa sueod it botelya. Guin daea nana ro botelya idto sa andang baeay ag basagon agud mabo-oe ro mapa. Suno sa mapa, may nakatagong tadyaw nga puno it bueawan sa ikatlong bukid halin sa anda. Una man sa instruction nga kon maka-subeang imaw it kaaway, iwasiwas eamang ro mapa.
Pagka-aga, nagpanaw si Ramir agod osoyon ro tadyaw nga may bueawan. Pag-abot sa primerong bukid, naka sub-eang imaw it isaeang ka leon. Guin wasiwas nana ro mapa ag nag eohod kana ro leon. Nag padayon si Ramir sa pangaywang bukid, may naga bantay man nga mas mabahoe nga leon. Ana man nga guin wasiwas ro mapa, dungan ro pag eohod it leon. Sa ikatlong bukid, nagpakita ro pinaka mapintas ag pinaka-mabahoe nga leon, ogaling owa it mahimo sanda sa gahum it mapa. Sanda hay olipon ko mapa. May nagpakita kana nga isaeang ka magueang nga naga baston. Guin usoy kana ro mapa. Owa nana guin pakita ro mapa kon owa kana guin turo ko magueang ro tadyaw nga puno it bueawan. Guin ibhan imaw sa isaeang ka eungib ag idto tumambad kay Ramir rong bueawan nga anang guina osoy.
Guin daea nana ro bueawan. Pag abut sa guin hari-an, ana anay nga guin tago. Nagderetso anay imaw sa palasyo, ogaling indi imaw pagpasudlon it mga guardiya. Guin wasiwas nana ro mapa ag nag guwa ro tatlong ka leon. Hinadlukan ro tanan sa palasyo. Guin pasueod si Ramir. Guin tawag nana ro anang mga alagad ag sugu-on nga boe-on ag pas-anon ro tadyaw pa adto sa hari. Sobra ro kalipay it hari. Bu-ot nana nga angkunon ro mga bueawan ogaling indi nana igpakasae ro anang ongang prinsesa. Habasa ni Ramir ro paino-ino it hari busa, guin wasiwas eon man nana ro mapa. Gumuwa ro tatlong ka leon nga bu-ot hakmaeon ro hari. Kon indi nana igpakasae ro prinsesa, seguradong eapa-eapa-on imaw ko tatlong gutom nga leon.
Hinadlukan ro hari. Insigida, guin hiwat ro kasae ni Ramir ag ko prinsesa. Ogaling ro mga bueawan hay owa guin tao ni Ramir tanan sa hari. Idto ro iba sa eungib nga guina bantayan it tatlong ka leon.
Halin kato, si Ramir ro guin kilaea nga hari it bueawan pagkamatay ko hari. Sa kaeo-oy ni Ramir sa mga tawo, guintaw-an nana it mga bueawan ro mga tawo agod maka bulig sa andang pagpangabuhi. Ro kaharian ni Ramir hay bukang-bibig bangud owa it gutom sa andang kaharian. Tanan hay malipayon ag owa it panakawan. Kada isaea hay bugana. /MP