Sugilanon Ni Tita Linda

Ni Tita Linda Belayro

Sobrang Pagpalangga

May isaeang ka ina nga may pitong dag-on nga onga. Gwapo ag sadya-an it pang-eawason rayang onga. Palangga gid imaw ko anang nanay. Haeos owa naga halin sa anang euyo rayang onga. Sa madaling hambae, nagmasakit rayang onga. Owa magbuhay ag namatay imaw. Duro guid ro kasubo ko anang ina. Haeos indi imaw maka kaon sa pagtinangis.
Pagkatapos it eobong sa onga, sige-sige nga pagpakita ko onga kana kada gabi-i sa mga lugar nga pirmeng guina hampangan nana. Kon Makita nana nga naga tangis ro anang ina hay naga tangis man imaw.
Isaeang gabii, sa sige nga pag tilinangis ko anang ina, nagpakita imaw sa anang ina nga may daea nga maisot nga lampara. Naka suksok imaw it puti nga guin paeambong kana sa anang eobong. Idto imaw nagpakita sa sikwayan ko anang ina. Pagkabatyag ko anang ina, habugtaw imaw.
Naghambae ro patay, “Inay punduha eon ro imong pagtinangis ay indi ako makatoeog bangud bunak ro akong eambong sa kaabu-abo nga eoha nga naga halin kimo.”
Hinadlukan ro nanay ag nag pundo eon imaw sa pagtinangis. Masunod nga gabii, nag pakita eon man ro onga, nga may daea nga lampara. May korona nga mga bueak ro anang oeo.
Naghambae ro patay: “Tan-awa nanay, mamaea eon ro akong eambog, ngani naka pahuway eon ako ag naka toeog sa akong eo-eobngan”.
Halin kato, guin haead nana sa Diyos ro anang kasubo. Guin pas-an it mahipos ro anang kasubo. Owa eon man magpakita ro patay ag mahamu-ok eon nga naga pahuway ro onga sa anang maisot nga katre sa idaeum it eogta. /MP