Sa Kilid It Suba It Akean

Ni Ronquillo C. Tolentino

Ro Fiesta It Minatay Ag Ro Kamatayan It Tawo

May ginahambae anay sa inakeanon nga owa kuno it tawo nga naga bato sa kalibutan. Sa iba nga hinambae, owa man it indi mamatay.
Ay ro panangis nga nagahalin sa duyan hay may ana nga gina-agtunan nga imaw ngani ro eobnganan. Sa momento nga ro tawo matawo sa kalibutan, maga umpisa man imaw nga mamatay. Royon ro natural nga orden ag daean it kabuhi.
Daywa eon lang nga adlaw, halin makaron nga magapanumdum kita eon man ko atong mga nagtaliwan nga mga guinhigugma o sa okasyon nga ginatawag nga fiesta it minatay.
Ro kamatayon, sa hinambae sa Bibliya ag iba nga kasueatan, hay naga abot kimo mana ko manakaw kong kagab-ihon. Ag naga abot ro kamatayon nga owa naton gina-paabot eagi. Busa, naga estar kita nga mana nga kada momento hay katapusan it aton nga pagpangabuhi.
Sa mga kasueatan it pagtu-o it sari-sari nga mga relihiyon, naga sa-ad nga may kabuhi pagkatapos it kamatayan. Ngani, guinahambaean ro tawo it mga iba nga relihiyon sa bug-os nga kalibutan nga indi ro tawo mag paisoe it pagreforma it ana nga pagpangabuhi nga sa paghangup nga sa anang ulihi nga paginhawa hay maka-abot pa imaw it paghinuesoe ko anang mga kasae-anan. Ay ro tawo kono nga mayraya hay mana ko tawo nga nagapanaw o nagasakay sa tren apang naga empake eamang imaw it anang daehon kon mabati-an nana ro sirena it naga-agi nga tren.
Sa aton nga pag-pangatubang it pagpaino-ino it nagtaliwan nga aton nga guinhigugma ag nag-una katon, aton nga paino-inohon nga ro mga nagtaealiwan hay aton man nga pagasundan sa hin-aga o masunod. Mahadlok man lang ro tawo it kamatayan kon abo ro anang guinbuhat nga bukon it mayad sa anang isig ka tawo ag sociedad. Mabudlay ro mga tawo magpaino-ino it indi mapunggan nga kamatayan kon mabahoe ro anda nga guinadaea sa anda nga konsensya.
Sa pagpaino-ino it nahauna katon, aton nga panan-awon nga ro mga nahauna katon hay dumdumon naton bukon eamang it kada fiesta it minatay, kundi sa aton nga adlaw-adlaw nga paghueag sa aton nga pagpangabuhi ag pagpangita.
Pangamuyu-on naton nga ro mga nahauna katon hay namatay nga nangin malipayon ro andang pag-agi, agud man kon kita ro tumaliwan hay may aton man nga esperanza nga ro mga buhi nga aton nga guin unahan hay maga pangadie man katon nga ro aton nga pagtaliwan hay nangin malipayon. /MP