Sugilanon Ni Tita Linda

Ni Tita Linda Belayro

Napuslan Nga Kahinaan

Tiñong sinto-sinto ro tawag kana ko anang kasimaryo. Perme eang imaw nga guina uto-uto ag guinatago ro anang saewae kon magkatoeog sa kilid it karsada. Guina taw-an man imaw it sandwich, ogaling ro palaman hay tinuktok nga katumbae.
Isaeang adlaw, may nag-agi nga saeakyan ag nakita imaw. Nagpundo ro saeakyan ag guindaea imaw ko mga sakay sa saeakyan sa isaeang ka mabahoe nga baeay.
Owa it ginikanan si Tiñong ag owa man kana it nakakilaea kon taga-siin gid si Tiñong. Bangud nga nagugutuman imaw sa kalye hay nasamad ro anang paino-ino.
Guin paboeong imaw sa espesyalistang doctor. Guin obserbahan imaw hasta nakabalik ro anang tamang paino-ino. Guin usoy ro anang guinikanan ogaling patay eot-a sanda. Ko isaeang gabii ngaron sa anang hamuok nga katueogon, nagdamgo imaw. Idto kuno imaw sa isaeang ka maeapad nga eati, ag hakita nana ro anang ina nga nagatatap kana. Suno sa ana kunong sugid, naghambae ro anang ina nga bukon imaw it minatuod nga anang ina. Hapueot eang nana imaw sa kilid it simbahan pagkatapos ko misa ko adlaw nga Dominggo. Guindaea imaw sa baeay. Bangud sa kapobrehan, nagmasakit ro anang ina-inahan ag namatay. Bangud sa owa eon it nag asikaso kana, nangin palaboy-laboy imaw sa kalye hasta nangin sinto-sinto.
Samtang naga katoeog si Tiñong, hakita kong babaye ro yunar sa likod ni Tiñong. Imaw ro paeatandaan nana sa nadueang onga. Pagbugtaw ni Tiñong, hakibot imaw nga ona naga pungko ro babaye sa anang katre. Guin sugid kana ro tanan. Nangayo imaw it patawad kay Tiñong ro babaye. Pagka aga, ko agahon ngaron, nag eopad ro daywa pa Amerika para mag-apas sa anang asawa ag ama ni Tiñong nga may mga negosyo sa Amerika. Nag abot sanda sa residensya ko asawa nga ama ni Tiñong. Sa andang pag-abot, mabahoe nga selebrasyon ro guin hiwat. Guin pakilaea ro anang asawa ag si Tiñong sa mga kaibahan. Guin patun-an imaw. Pagka-taliwan it limang dag-on, nagbalik si Tiñong sa Pilipinas. Guin adtonan nana rong lugar nga perme nanang guina estambayan. Guin huki-pan nana it kwarta si Aling Juling. Imaw ra abi ro sangka babaye nga naga ta-o kana anay it pagkaon. Guin usoy man nana kon siin si Tiñong sinto-sinto ogaling owa eon sanda nakasayod, basi kuno kon patay eota-a. /MP