Sugilanon Ni Tita Linda

Ni Tita Linda Belayro

Regalo Ni Haring David

Kada mag abot ro kinatawuhan kada dag-on ni Haring David, guina tipon nana tanan ro mga kabinataan agod mag tao it regalo. Rikara man imaw naga pili sa mga soldado nana agod buslan ro mga magueang eon.

Isaeang agahon pa sa anang compli anyo hay naga pila eon ro mga binata agod kon una eon sa trono ro hari hay guina pasueod eon tanan sanda. Isaea eon baea si Sajid sa mga kabinataan nga naga hueat sa pagbukas it puwertahan. Sa owa magbuhay, guin buksan eon ro puwertahan it palasyo. Nag ueonahan ro kada isaea sa pagpili ko mga bagay nga naka hat-hat sa lamesa. Pagusto it pagpili ro kada isaea kanda. May habilin nga tuktukon eon nga yabi nga imaw ro guin bo-oe ni Sajid. May hakita man imaw nga kwarto una sa palasyo. Anang guin samitan nga abrehan paagi sa ratong yabe.

Habuksan nana ro puwertahan ag tumambad kana ro naka tumpok nga mga toeon-an. Anang guin buksan ro sambilog nga libro. Anang ha notahan nga ro mga tawo sa ritrato hay matsa mga buhi. May nag eapos nga aso sa sueod ag ro hugom hay naka patoeog kanda. Sa anang pagbugtaw, idto si Sajid sa lugar nga matsa paraiso. May karatula una sa puwertahan nga may naka sueat: "Ro malimpyo it paino-ino ag tagipusuon ro sarang eamang makasueod".

May golping nagtunga nga isaeang ka ada, guin boytan na ro butkon ni Sajid agod markahan. Nagpiyong imaw sa kasakit nga anang nabatyagan. Sa pagmuk’eat ni Sajid, idto eon imaw sa sueod it palasyo. Nagkililita sanda ko ibang mga binata. Kada isaea kanda hay guin pakita ro andang mga guin daea pabalik agod ipakita man kay Haring David. Pag abot kay Sajid, guin pakita nana ro anang marka sa butkon tongod owa man imaw it daea. Nagtango-tango ro hari. Sayod nana ro kahueogan ko rondoyong marka.

Guin himo imaw nga taga laygay ni Haring David tongod sa anang kaputli ag ka limpyo ko anang paino-ino ag tagipusuon. /MP