Sugilanon Ni Tita Linda

Ni Tita Linda Belayro

Ro Kuring Nga Bu-ot Mangin Tawo

May isaeang ka kuring nga bu-ot mangin tawo. Para matuman nana ro anang handum, nag adto imaw sa templo it mga monghe kada kabilugan it buean.

Sa templo, guina pangutana imaw kon ano ro anang katuyuan sa pagpanaw. Nagpahayg ro kuring nga bu-ot nana nga mangin tawo. Busa guin basbasan imaw ag naghambae ro monghe nga hitsura eamang ro mabag-o kana. Matapos ro pag basbas, nag uli eon ro kuring.

Pag-abot sa anang baeay, habatyagan nana nga nag bag-o ro anang hitsura. Duro guid ro anang kalipay. Halin kato, malipayon eon imaw nga ga pinamasyar ag mag adto sa mga kasadyahan. Abo man nga mga daeaga ro nahikaw kana tongod iba ro anang ka gwapa ikumpara sa ibang mga daeaga.

Isaeang adlaw, nag pahisayod ro hari nga magapili eon imaw it mangin asawa ko anang ongang prinsipe. Guin kangay ro tanan nga kadaeagahan sa kaharian agod magtambong sa rayang okasyon. Nag pahaum man ro daeagang kuring nga magtambong. Nagpatahi imaw it pinaka mahae nga eambong agod anang isuksok sa okasyon.

Umabot ro oras nga naka taeana. Ko gabi-e ngaron, mahayag ro palasyo. Abo guid nga mga daeaga ro nagtambong. Pagkakita ko Prinsipe sa daeagang kuring, mingko nag eopok ro daeogdog sa dughan. Matsa napunaw imaw sa hitsura it daeagang kuring. Bu-ot nana regaluhan eagi ro daeaga it alahas. Ogaling ro dueot hay guin balibaran nana.

Owa mat-a magbuhay ag ro anang handum hay natuman man kat guin pili imaw nga mangin asawa it prinsipe.

May isaeang ka pilosopo nga bu-ot tungkaron ro pagkatawo ko daeagang kuring. Sa adlaw it kasae, sa lamesa nga guina kan-an it mga bisita, may guin butang nga mga manamit nga putahe. Guin bantayan ko pilosopo kon anong putahe ro anang pili-on. Guin buksan it tig sambato ro mga guin hikot nga mga pagkaon. Owa guid it hapili-an nga kan-on ro daeagang kuring.

Ro katapusan nga putahe hay guin buksan. Pagbukas, eomompat ro sangka eanggam. Guin eotos nga eotos ko daeagang kuring hasta guid madakpan. Nagkasangag ro mga bisita.

Nasayuran ko pilosopo nga ro daeagang nobya it prinsipe hay isaeang ka kuring. Nagbaylo eamang ro dagway apang ro batasan hay owa guid mabayluhi.

Sa kahuya ko hari ag reyna, guin papanaw nanda ro prinsipe sa ibang lugar agod malipatan ro natabo. Nagbalik mat-a ro kuring idto sa anang guin halinan. Nag pangako man nga indi eon imaw maghandum pa nga mangin tawo. /MP