Ni Tita Linda Belayro
Ham-an It May Tunok Rong Rosas?
Kato anay nga tiyempo hay owa pa it tunok ro bueak nga Rosas, sangka paborito nga bueak. Imaw ro naila-an nga bueak sa tanan nga oras ko reyna it kagueangan. Masyadong delikado ro tanum nga Rosas ag perming naga masakit. Kinahang-ean tatapon gid it naga kaigo. Taeagsahon imaw nga naga pasilak ag naga paeayo sa mabaskog nga hangin tongod naga kadagas ro anang mga petalya.
Ko isaeang agahon, ngaron, samtang naga pamasyar si Reyna Ada, nakabati imaw it may naga tangis. Guin su-uran nana ro lugar nga guina halinan it tangis. Pag abot ko Reyna, hakita nana ro anang paboritong bueak.
“Ano hanabo kimo, Rosas? Ham-an it naga tangis ikaw?” may pagkabaeaka nga mga pangutana it Reyna.
“Ano abi ay may mga unga nga nag pinang kotoe ko akong mga sokoe. Guin pang wigit pa ro iba nakong petalya. Owa it eabot karon, may daywang ka baka nga nagsueongayan ag guin tapakan pa ako. Hayra nagkaeabali-bali ro akong mga sanga”, masubo nga sabat man ko Rosas.
Indi mabaton ko reyna ro natabo kay Rosas. Naeo-oy gid imaw it duro.
“Agod indi ka eon pagsamaron ag hampangan it mga unga, akon ka nga butangan it mga tunok agod kon sin-o man ro maga samad kimo hay matunok ag masakitan imaw. Indi eon kimo makaeapit ro mga hayop tongod nahadlok sanda nga matunok. Ro maga ipo kimo sa imong bueak hay dapat magdahan gid.
Owa it eabot karon, mangin maisog eon ikaw nga makipag atubang sa hangin ag silak”, pahayag nga sumpa ko Inang Ada.
Halin kato, may mga tunok eon ro tanan nga klase it Rosas. Ro iba hay naga kamoy ag indi basta mabali ra sanga kon hanginan. Ro bu-ot mag ipo it Rosas agod ibutang sa altar o plorera hay maga dahan gid it pag gunting agod indi matunok. /MP
No comments:
Post a Comment