Sugilanon Ni Tita Linda

Baeangaw Tulay It Mga Diosa

Ni Tita Linda Belayro

Sa bukid it Olympus naga estar ro mga Diyosa. Duro ro naga bantay sa andang pagpanaog sa patag. Kon magtunga ngani ro baeangaw, naga patima-an nga may Diyosa nga manaog sa datag. Sa anang pagpanaog, naga daea imaw it kamaeayran sa tanan nga makakita kana tongod sa kutob nga anang maagyan hay naga tao it bueawan o kon ano nga maeahaeon nga bato. 

Sa isaeang maeapit nga baryo, may naga estar nga manog gatas it baka nga si Milka. Imaw ro kabulig ko anang ina sa paggatas sa mga hayupang baka. Sa mga baka nanda ro andang kwarta ga halin. 

Sanda hay mga kabulig ni Don Gustavo, isaeang ka istrikto nga tag-ana it maeapad nga eogta maeapit sa bukid it Olympus. 

Ko agahon ngaron, samtang naga pahaom it paggatas si Milka, may nagtunga nga baeangaw sa eangit. Kinoeba-an imaw ag nag pang eamig ro anang eawas.

Naga daywa-daywa ro anang paino-ino kon mapanaw imaw o indi agod bantayan ro pagpanaog it diyosa. Tongod sa masyadong estrikto ro andang amo ag permi pa sanda nga guina sakit, guin pili ni Milka nga mag pasimpaead.

Inaywan nana ro mga baka ag dumaeagan para magbantay sa pagpanaog it diyosa. Owa mabuhayi, naghayag ro baeangaw. Masilaw nga mayad. Guin piyong nana ro anang mata. Madali manlang ro pagpiyong. Pagmuk-eat nana, hakita nana nga ro diyosa it kabueakan ro nanaog ag nagpamasyar sa isaeang ka hardin. Guin sunod ko anang panueok kon siin maghalin ro diyosa hasta nga naduea. 

Nagbalik sa eangit ro diyosa paagi man sa baeangaw. Pag-abot nana sa lugar nga guin agyan it diyosa, hakita nana ro naga hayag nga mga bato ag diyamante. Nangin bueawan man ro kutob masaghiran nga mga dahon ko anang eambong. 

Dali-dali ni Milka nga guin pueot ro mga bato ag guin pang kotoe ro mga dahon ag isueod sa anang boesa.

Mabakas nagbalik sa mga baka si Milka. Sa anang pag-abot, haabutan nana nga akig it duro ro Don tongod bu-ot nana nga mag inom it gatas, ogaling owa pa maka gatas. Guin paea-as nana ro mag ina nga naga taeangison. Indi haeos mag halin si Milka kay Don Gustavo, ogaling pilit imaw nga guin pahalin. 

Busa, naghalin ag nagpanaw sanda. Pag abot sa palhi nga lugar, guin pakita ni Milka sa anang ina ro anang daeang mga bato. Nagpaeayo ro daywa ag nag adto sa syudad. Idto sanda nag estar ag naka patindog it negosyo sa alahas ag naga obra it mga mwebles. Naka bakae man sanda it maeapad nga eanas nga guin patindogan it paktoriya it gatas. 

Owa nakasayod si Don Gustavo nga ro anang dating sueogo-on ag manog gatas hay pareho mang negosyo ko ana. 

Mabu-ot guid matuod ro Diyos. Maeapit imaw sa mga kubos ag mga tawong guina tuya-tuya. Kaantiguhan imaw kon hin-uno Nana ikaw paga taw-an it kapahuwayan. Ayaw guid pagdali-a Imaw, ro mahae nga Diyos. /MP