Sugilanon Ni Tita Linda

Ni Tita Linda Belayro

Tikbalang

Ro tikbalang hay aeang-aeang. Tawo baea ra? Hayop ra? Ro tikbalang hay katunga nga kabayo ag katunga nga tawo. Kon siin naghalin ro unang tikbalang, owa man it nakasayod. Ogaling may isaeang ka historya nga may kaangtanan sa unang tikbalang. 

Si Loro hay isaeang ka binata nga naga alila it kabayo. Sa mga kabayo nga guina pa alilaan kana, may parayaw imaw nga isaeang ka babaye nga kabayo. Guin hingaeanan nana kay Black Princess. 

Ko olihi, nagtiyo si Black Princess ag guin tawag nana kay Black Jackie. Hapan uhan ni Loro nga may bueawan nga buhok sa anang idaeom it ikog ro tiyo. Nangin swerte kay Loro si Black Jackie. Permi imaw naga daog sa sugae ag maskin anong hampang ro anang guina intrahan. Kon owa imaw it makaon, naga bo-oe imaw it sangka buhok ag daehon sa alahera agod ibaligya. 

Sa kada daea nana it bueawan nga buhok, naga kangawa ro alahera kon siin imaw naga bo-oe. Guin papanid-an it alahera si Loro. Ko olihi, nasayuran nana kon siin naga halin ro bueawan nga buhok. Bangod sa kasueok it manggad, nagdesisyon ro alahera nga takawon ro kabayo. 

Ko gabi-e ngaron, guin sakay sa karito ro kabayo ag guin daea sa isaeang ka kwadra, sugo it alahera. Nag pa-ongae ro kabayo. Nagpilit nga maka libre. Eomompat imaw sa mataas nga pader ag nagpadueong idto sa isaeang ka eongib. Ro eongib hay gina estahan it mga kabayo. Guin baton imaw it pinuno it mga kabayo.

Naggueowa tanan ro mga kabayo ag doeongan nga nag haginghing. Samtang guina inusoy ro kabayo ko mga tawohan it alahera. Nag gueowa ro mga kabayo sa liwan it eongib ag guin abangan ro mga tawo nga naga usoy kay Black Jackie. Guin pang baril ro mga kabayo ogaling owa guid tanan sanda madutli. Nag abot dayon ro pinaka puno it mga kabayo. Sa kusog ko anang gahum, guin himo nana ro mga tawo nga tikbalang. Ro andang ibabaw hay tawo ogaling ro andang siki hay kabayo. Nagkaduea ro mga kabayo ag nagbalik sa eongib. Habilin ro mga tikbalang una sa kagueangan. 

Owa eon sanda makauli tongod sigurado nga kahadlukan sanda it mga tawo. Nagbalik kay Loro si Black Jackie kaibahan ko anang ina. Padayon pa guihapon it pag alila it mga kabayo si Loro. Hanungod sa mga tikbalang, si Loro eamang ro nakasayod kon ham-an it imaw ro andang nadangatan. /MP