Sugilanon Ni Tita Linda

Ni Tita Linda Belayro

Bangkil Ni Lolong

Si Lolong ro guina kilaea nga pinaka mabahoe nga bu-aya bukon eang it sa Pilipinas kundi sa bilog nga kalibutan. Raya ro naka lista sa Guinness Book of World Records. Rondaya man ro nagdaea it dungog sa Pilipinas. Tongod kara, abo nga mga turista ro naga pangayaw agod maboe-an it retrato. Tongod sa mga bisita abo man nga kwarta ro naga sueod sa kaban it atong gobyerno. 

Nahamtang si Lolong sa kontrolado nga lugar. Indi man imaw maka pagusto it panaw. Abo abi nga mga tawo ro naila mag tan-aw ag naga hampang kana. Indi man masayuran kon guina itsahan imaw it pagkaon. 

Tongod sa kabuhayon eon, nag gueang ag eoya si Lolong nga owa mapan-uhi ko anang tumaean-aw. Si Berto gid eamang ro nakabatyag, ro naga alila kana. Nababasa ni Berto sa mga eoha ni Lolong nga bukon imaw it malipayon. Sa kada eapit ni Berto kay Lolong, guina pakita ko bu-aya ro anang bangkil. Matsa may bu-ot hambaeon kay Lolong. 

Umabot ro guina kahadlukan ni Berto. Ko isaeang agahon ngaron, guin adtunan ni Berto ro guina kulungan nga lugar kay Lolong. Pag eapit ni Berto owa eota naga hueag si Lolong. Parabil imaw mag sugid sa anang agaeon, guin potoe anay nana ro sambilog nga bangkil ag guin tago. Guin report nana ro natabo kay Lolong. Owa it nahimo ro mga tawohan. Patay eon si Lolong. 

Mingko bomba nga eompok ro balita. Nagkasubo guid ro tanan. Mas masubo si Berto tongod napa eapit eon kana si Lolong. Abo man ro naakig kana ag imaw ro guina pabangdan sa pagkamatay ni Lolong tongod kuno sa anang kapabayaan. 

Samtang naga tikang–tikang imaw sa karsada, may umagi nga naga sakay sa motorsiklo ag guin baril imaw, ogaling umigo ro bala sa boesa nga una ro bangkil ni Lolong. 

Umuli imaw sa andang baeay. Guin sueod nana ro bangkil sa itom nga tela ag guin kulentas. Nagapati imaw nga rondaya ro bu-ot hambaeon kana ni Lolong. Ko gabi-e ngaron, may habati-an man imaw nga huni it tik-tik sa ibabaw ko andang atop it baeay. Bumangon imaw ag guin pakita ro bangkil ni Lolong. Golpi nga naduea ro tik-tik ag owa eon magbalik. 

Halin kato, daea-daea ni Berto permi ro bangkil ni Lolong. Abo nga mga kaaway ro guin atubang ni Berto ogaling guina libre imaw ko bangkil ni Lolong. Nagkaasawa eon imaw ag nangin maeumo ro anang pag pangabuhi. Owa man imaw naga kalipat sa pagpasaeamat sa Diyos paagi sa pagbulig sa mga kubos. /MP