Sugilanon Ni Tita Linda

Ni Tita Linda Belayro

Alila Ni Apo Lakay

Pinaka maeapad nga patag ro guina panag iyahan ni Apo Lakay. Bata pa imaw ka’t ana nga guin pang hawanan ro kagueangan hasta anang guin aplayan it titulo ro kutob ko ana nga nalimpyuhan. Sa anang pag pangabuhi, rikara imaw nakaasawa ag naka unga hasta naka apo. Imaw ro anang guin umahan it paeay nga guina pagaling nga bugas, guina anihan it tinoea ag prutas sa andang lugar. Nakapatapos imaw sa anang mga onga sa pag eskuyla sa kolehiyo. Tanan man sanda hay puro man nakapag asawa. 

Isaeang adlaw, hakibot si Apo Lakay sa golping pag aeabot it mga bulldozer ag maeagko nga trak sa anang lugar. May guin ta-o kana nga papel nga permado it tag-ana. Guin baligya gali ko anang onga nga inhenyero ro anang eogta nga owa imaw nakasayod. Busa, makaron hay guina limpyuhan ko naka bakae agod obrahon nga mall. Sa kaakig ni Apo Lakay, nagpanaog imaw sa basement ag guin buksan ro isaeang ka kahon nga mabuhay eon nga owa habuksi. 

Gumuwa ro maputi nga sawa ag golpi mang nadoea. Owa mabuhayi, nag aeabutan ro kaabo-abo nga sawa ag guin pang angkit ro kutob tawohan it bag-ong tag-ana. Nagpauli eon lang sanda. Sa andang pag abot, guin sugid nanda sa tag ana ro tanan. Guin balik ko milyonaryo nga intsik ro eogta ni Apo Lakay. Guin uli man ko inhenyero ro kabakeanan ko eogta. Nangayo imaw it patawad sa anang ama. 

Hanangda sa sugae ag iba-ibang bisyo ro anang onga ag nagbueag pa sanda ko anang asawa. Busa, nagbalik eon lang imaw sa anang ama ag nag pangako nga imaw ro maga tatap ko andang eogta. Pagkasayod ko anang pamilya nga nag bag-o eon ro andang ama, nagbaealik ro bilog nga pamilya sa maskin kato pa hay una eon sanda naga estar sa baeay ni Apo Lakay.  /MP