Ro Eamang ag ro Eangaw
Nagahaboe ko anang baeay ro isaeang ka eamang. Nabatyagan nana rong kagutom ogaling owa pa it makita imaw nga kan-un. Mangan-angan may hakita imaw nga eangaw.
“Hapit anay ag mag sueod sa akon nga parlor,” sampit kong eamang sa eangaw.
“Ron daya rong pinakasadyaan nga parlor nga imong makita. Ro akon nga hagdan hai palibot-libot ag abo pa nga mga bagay nga makita ka nga owa mo pa makit-i sa bilog mo nga kabuhi,”.
“Ah, indi, saeamat guid,” balibad it eangaw.” Indi mo ako mapasugot, tongod sayod ko nga rong makasueod sa imong parlor hay indi eon makaguwa”
Katam-is nga tinuga. Listo ka ag maaeam. Sadyaan guid ro imong mga pak-pak ag naga sidlak ro imong mga mata tuead it mga bituon sa eangit. May akon nga espiho sa sueod it parlor. Kon maghapit ka it madali, makita mo kon ano ka postura ro imong kaugalingon, dugang nga pagdayaw kong eamang.
“Saeamat guid, amigong eamang sa imong pagdayaw ogaling kinahang ean ko eon nga magpanaw. Magakita ugaling kita sa pilang adlaw, “pamalibad it eangaw.
Nagsueod rong eamang sa sueod. Sayod imaw nga indi magbuhay, magabalik rong eangaw. Nagpadayon imaw it pag haboe gamit rong seda nga hilo agod pahauman ro pagbalik ko eangaw.
Nagbantay eon man ro eamang sa anang pwertahan. Samtang naga kanta-kanta, bumalik ro eangaw.
“Saylo anay, posturang eangaw nga may perlas ag pilak nga pak-pak. May kapa nga berde ag lila. Sa imong ueo hay may korona. Ro imong mga mata hai kapareho ko diamanteng naga siga samtang rong akon, owa guid it siga kundi kapares it saesaeon,” buhos nga buhos nga pagdayaw kong eamang.
Ro uto-utong eangaw hay naengganyo kong mga matam-is nga dila it eamang. Amat-amat nga nagpaeapit sa baeay it eamang hasta dumukot imaw sa sapot ag owa eon makahueag. Owa imaw it ibang guin paino-ino kundi ro anang naga kintab nga mata, ro sari-saring kolor nga kapa ag korona sa anang ueo. Aha! Sinana ko eamang. Makaron manamit eon rang ilabas.
Golping hinabnit imaw ko tusong eamang ag guin guyod sa sueod ko anang parlor. Ag rong pobreng eangaw hay owa eon nakabalik sa anang guinhalinan. /MP
No comments:
Post a Comment