Sugilanon Ni Tita Linda

Prinsesa It Mga Adoro

Ni Tita Linda Belayro

May natawo nga eapsag sa mag asawang Amboy ag Lucing. Sa anang pagkatawo, may bokoe nga naga timbang sa likod it eapsag. Pag eaum ko mag asawang Amboy ag Lucing hay ordinaryong bokoe manlang. Guin pangaeanan nanda ro onga nga si Ardeña. Ko olihi, nag buswang rong bokoe ag may nagtunga nga maintok nga pakpak. Samtang naga bahoe nga naga bahoe ro onga nga si Ardeña, nagatubo man rong pak-pak. Guina eambongan imaw nanda it madamoe ag perming may balabal agod indi makita it ibang tawo.

Mabahoe eon si Ardeña. Kapareho it ibang mga inunga, guina sampit imaw nga mag hampang, magpaligos sa suba ogaling naga balibad imaw. Ko olihi, agod makalikaw sa pagsunlog it mga tawo eabi gid it mga onga, naghalin sanda it ilistahan. Idto sanda sa kagueangan nag estar. Idto man sanda nag alila it mga hayop ag nagpananum. Nag umwad ro andang mga hayop ag mga tanum. Kon amat, naga munot si Ardeña sa anang ina kon mag adto sa tindahan. Idto hakita nana kon ano kasadya ro mga babayeng kapareho nana.

Isaeang adlaw, sa owa gina huna huna-a, may nag tugpa nga mabahoe nga pispis sa andang baeay. Sa medaling oras nangin amiga ko pispis si Ardeña. Halin kato, perming naga balik balik ro pispis kay Ardeña. Nagbahoe ro pispis samtang naga bahoe man si Ardeña. Ko olihi, nagsakay imaw sa likod it pispis. Naglinibot sanda sa giwhanan hasta nakaabot sa mataas nga bukid, isaeang ka ginharian it mga pispis nga adoro. Maangan-angan, gumuwa ro pinaka reyna it mga Adoro. Guin baton si Ardeña. Imaw kuno ro guin numbrar nga prinsesa ag maga salbar ko mga Adoro. Halin kato, permi nga naga bisita kon gabie si Ardeña sa kaharian it mga Adoro sakay sa pispis. 

Umabot ro takda nga oras nga ro pispis hay isaeang ka prinsipe. Guin kasae sanda ag pagkamatay ko anang guinikanan, si Ardeña ro nangin reyna it mga Adoro. /MP