Sugilanon ni Tita Linda

Ro Kaisog Ni Daniel

Ni Tita Linda Belayro

Ro hari it Babylon hay nagdamgo. Ogaling sa pagbugtaw nana hay indi man nana matandaan ro anang damgo. Agud matukiban ra damgo, guin patawag nana ro mga mangin aeamon it palasyo. Ogaling owa guid sanda nakatugma. Sa kaakig it hari, guin manduhan nana ro anang sueoguon nga ipapatay ro mga mangin aeamon.

Pero guin pakita it Diyos kay Daniel ro damgo it hari ag kon ano rong kahueugan. Guin sugo ni Daniel nga indi ipapatay ro mga mangin aeamon. Imaw ro matugma kong damgo eakip ko anang kahueogan. Suno kay Daniel, nagakahueogan nga rong evanghelio hay igato-on sa tanan. Si Jesus ro mangin hari sa tanan nga tawo sa kalibutan.

Malipayon rong hari sa anang habati-an. Guin obra nga pinuno si Daniel. Umabot rong tiyempo nga nagbaylo eon rong hari. Imaw si haring Darius. Nagpili imaw it mga kaeaeakihan nga makabulig kana. Si Daniel ro anang guinpili nga mangin pinuno. Abo nga owa naila kay Daniel nga andang pinuno. Duro ro nahaikaw kana, Busa nagplano sanda kon mauno makabaeos kay Daniel.

May batasan si Daniel nga magpangamuyo it tatlong beses sa sang adlaw. Hakita ra it mga kaibahan nana. Nag-adto sanda sa hari ag nagpaobra it pabando nga owa it tawo nga magto-o sa ibang Diyos kundi sa hari eamang. Kon sin-o ro madakpan hay pagasilotan. Nagpasugot rong hari ag guin pabando sa bilog nga kaharian rong kasugu-an. Owa magpundo si Daniel sa pagpangamuyo. Hadakpan imaw it mga tawo ag guindaea sa hari. Nasubo guid ro hari ogaling owa imaw it mahimo tungod imaw rong nagobra kong kasuguan.

Guinperiso si Daniel sa kulungan it mga liyon. Pagkataliwan it pilang adlaw, ko isaeang gabi-i, nagpu-asa rong hari. Indi imaw makatueog. Pagkaaga, agahon pa imaw nga nagbisita sa kulungan it liyon. Guin tawag nana si Daniel. Nagsabat si Daniel. Suno kay Daniel, nakalibre mat-a imaw sa mga liyon ay guinbutangan it busae rong bibig it mga liyon ko anang guina patihan nga Diyos. Nalipay rong hari.

Halin kato, nagpabando ro mahae nga hari nga kilaeahun rong Diyos ni Daniel. Ag imaw eamang rong pagasambahon it mga tawo. /MP