Sugilanon ni Tita Linda

Bito-on Sa Dahi Ni Almira

Parabil natawo si Almira, may magueang nga nagpanghimaead kay Anna Bilen. Suno sa hakita ko magueang ro unga ni Anna Bilen hay may bito-on sa dahi. Apang peligroso man ro anang kabuhi ag dapat nga haeongan.

Pagkatawo ni Almira, mananod eamang ro nagpa-unga. Hakita nana ro bito-on sa dahi ni Almira. Ro anang ina ag ama hay nakasayod man nga may bito-on sa dahi si Almira. Pag katapos it panghimos ko paltera, dayon imaw nga nag uli. Ogaling inabangan imaw sa daean it mga tawong nakasuksok it itum. Guinpatay ro mananod. Halin kato owa eun it nakasayod sa kabuhi ni Almira.

Kalisod it mga tawo ro andang Hari ag Reyna. Owa it eabot nga mapintas sa mga tawo, may guinatu-ohan pa sanda nga rebolto ag nagadaea it unga agod isakripisyo sa andang Diyos-diyos. Mga babaye nga unga eamang ro andang guinahaead. Pag tungtong sa tatlong dag-on, abo eon nga mga inunga rong guin pangsakripisyo.

May naka turo sa hari hanungod kay Almira. Guin padakop ro mag-asawa ag guindaea sa hari. Guingapos ro andang alema ko mag asawa agod indi makabalibad nga ihaead ro andang unga. Samtang guin ilisan it puti nga eambong si Almira ag guinpaeobog sa bato nga altar agod pagapatyon. Pagbukas ko anang higot sa dahi, golpe nga naghayag rong bito-on ag tinamaan rong rebolto. Nawasak rong imahen. Guin daeagan ko hari ag reyna rong rebolto, apang sanda man hay tinamaan ko kahayag it bito-on bosa namatay.

Nagkagulo sa sueod it palasyo. Nagdaea-eagan paguwa ro mga tawo ag kutob ratong mga sueogu-on it hari nga naga samba man sa rebulto hay nagkaeamatay.

Nagpasaeamat ro mga tawo. Guin bilang nanda nga sugo it eangit si Almira agod matapos rong maeain nga buhat it hari ag reyna.

Makaron, malipayon eon ro mga tawo nga nagatu-o sa minatuod-tuod ag buhi nga Diyos. /MP