Sugilanon Ni Tita Linda Ni Tita Linda Belayro

Ro Hermitanyo Ag Ro Baeo

Sa bukid it Tabor, may naga-estar nga hermitanyo. Paeangta manlang nagapakita sa tawo rong nasambit nga hermitanyo. Makita eamang imaw kon magpanaog sa bukid ogaling indi nanda masayuran kon siin imaw naga adto. Guina patihan nga relihiyoso rondayang hermitanyo. Naga pinangadi imaw ag naga puasa sa sueod ko anang guina estahan.

Isaeang adlaw, hakita nga nagpanaog rondayang hermitanyo. Owa masayuri kon siin imaw nagapadueong. Sa anang pagpanaw, ha-agi imaw sa sangka baeay. Nagpanuktok imaw sa isaeang ka baeay nga maisot manlang maeapit sa kagueangan. Nagbukas kana rong puetahan. Isa-eang ka babaye ro nag-abi abi kana. Sa andang pag-haeambae, hanotisyahan nana nga baeo gale ro baye. Hanabu-an nga naga patueog imaw sa anang unga nga masakiton.  

Nangayo ro hermitanyo it tubi sa ratong baeo. Pagkatapos, nangayo man imaw it pagkaon. Owa guid magpamalibad ro babaye.  Rondoyon eun lang ro katapusan nanda nga pagkaon, ag kon ipakaon pa nana sa rondayang tawo hay kabay nga may hibilin para sa anang unga. Sayod ro hermitanyo nga ronduyon eon lang guid rong pagkaon ko rondayang babaye. Pagkaeaha, guin hakiran rong hermitanyo ag dayon nagbalik sa naga katueog nga unga. 

Pagkatapos it kaon ko hermitanyo, nangamuyo imaw sa Diyos ag nag hambae, “Bendisyonan ka ko imong guin buhat. Tungod sa kahumok ko imong tagipusuon, guin una mo pa ro ibang tawo ko sa imong kaugalingon. Batunon mo rong grasya nga haead kimo it Diyos”. Nag panaw dayon ro hermitanyo.

Owa guid it habilin sa pagkaon nga guin tao sa hermitanyo. Nag adto imaw sa andang taeagbasan, agod siputon rong habilin nga bugas. Sa abo nga kangawa, eabang ro sueod ko anang taeagbasan, ag may pinutos pa nga karne ag prutas sa sueod. Nageuhod rong baeo ag nagpasaeamat. “Bulahan guid ako nga guinpili ag sukaton ro akong pagto-o. Bulahan man rong Diyos nga nagapamati sa pangamuyo it mga tawo.

Sa tiyempo makaron, kinahangean guid kita magpangamuyo ag magpasaeamat. Unahon naton Imaw eabi sa tanan bangod Imaw eamang rong makapuno sa atong kinahangean. /MP