Sugilanon Ni Tita Linda Belayro

Sueat Paadto Sa Eangit

Nagbahoe si Nengneng sa anang lola. Halin pa guid nga guin aywan imaw ko anang ina. Ro anang lola ro nagbatiti kana tungod nag masakit it polio ro unga. Maskin ngani indi makatikang si Nengneng, mabahoe man imaw nga kabulig ko anang lola. 

Maeapad ro tanum nga Sampaguita ko anang lola ag imaw ro nagatuhog para obrahon nga kulintas. Abo ro suki ko anang lola bosa owa sanda guina kabos sa pang adlaw adlaw nga gastos.

Isaeang adlaw, may nag-abot nga madre sa baeay ni Nengneng agod mag pidido it kulintas nga Sampaguita. Mabuot rong madre. Duro guid ro anang kaeo-oy sa unga pagkakita nana. Nangutana si Nengneng kon makaabot sa eangit kon magpadaea imaw it sueat. 

Owa it mahimo ro madre kundi nag paho-o agod indi mapaslawan rong pagea-um it unga. Guin bo-oe ni Nengneng rong guin obra nga sueat ag guin tao sa madre. Pag-abot sa simbahan, guin bukad ko madre ro sueat. Sueat rato para kay Papa Jesus.

Naghinyo nga usuyon ro anang ina nga owa nana makita it mabuhay eon. Bangod sa kaeo-oy, guindaea it madre rong sueat sa anang amigang announcer sa radio. Paagi sa radio, idto nangayo it bulig. Guin obrahan nanda it istorya ratong sueat, dungan ko pagpanawagan. 

Ko mga oras ngaron, nakabati rong ina ni Nengneng. Mabuhay eon nga bo-ot nanang makita ro anang unga ugaling owa imaw it oras bangod nagabantay imaw ko anang masakiton nga asawang Hapon. Guin adtonan nana rong estasyon it radiyo ag idto imaw nakabo-oe it impormasyon kon siin naga estar si Nengneng. Kaibahan ko Madre, nag adto sanda sa baeay nanday Nengneng nga naga tinuhog it Sampaguita. Nagkita rong mag ina. Nalipay man ro lola ni Nengneng bangod nagkita sanda ko anang unga. Guindaea sanda sa baeay kong ina ni Nengneng ag kumo owa sanda it unga ko Hapon, guin kabig nga unga ko hapon si Nengneng. Guin pabueong si Nengneng. Nakatikang imaw sa bulig it saklay.

Nag uli sanda agod magbisita sa andang dating lugar. Guin pa arkilahan nanda ro andang katamnan nga Sampaguita, agud may trabaho ro mga kababayehan sa andang lugar. 

Suno kay Nengneng, guina sabat mat-a gali ro sueat paadto sa eangit. /MP