Sugilanon Ni Tita Linda Ni Tita Linda Belayro

Tatlong Ka Prinsepe

May tatlong ka unga nga puro eaeaki si Haring Ramir. Sanday Prinsepe Val pinakamaaeam, si Prinsepe Janus, pinakagwapo, ag si Prinsepe Remus, mahugod ag pares ko anang amang mabuot ag maeapit sa mga pobre. Bangod magueang eon rong hari, bu-ot nana nga isaea sa anang mga unga rong mangin hari. Busa guintawag nana ro anang ministro agod maghimo it paindis-indis para sa tatlong prinsepe.

Ro plano it hari hay maghueog imaw it perlas nga itom sa tunga it dagat ag kada isaeang ka prinsepe hay mag-usoy. Kon sin-o kanda ro makakita hay itao sa hari parabil matunod rong adlaw. Guin explikar sa tatlong ka prinsepe ro plano.

Ko agahon ngaron, agahon pa nga nagbugtaw ro tatlong ka prinsepe. Kada isaea kanda hay haum eon. Samtang nagapadueong sanda sa pagasakyan nga baroto, may isaeang ka baeo nga nagpangayo it bulig nga daehon ro anang unga sa manug bueong bangod sa owa sanda it kwarta. 

Guin balibaran ko daywang ka prinsepe rong baeo. Nagpasugot sa hinyo nga magbulig si Prinsepe Remus. Matapos nga maihatod nana ro pasyente sa klinika, may nagtuhaw eon man nga sunog sa isaeang ka minuro. Nagbulig eon man it tapna sa sunog si Prinsepe Remus.

Owa si Prinsepe Remus, busa guindaea eon rong daywang ka prinsepe sa tunga it dagat sakay sa baroto. Makataliwan ro pilang oras, nagtunga si Prinsepe Val daea rong perlas. Masunod nag eutaw man si Prinsepe Janus nga may perlas man nga itom. 

Naga hangos nga umabot si Prinsepe Remus. Deretso imaw sa tunga it dagat agod mag-usoy it perlas. Ogaling owa imaw it guinhaboy nga perlas. Bukon it matuod rong perlas nga nakita it daywang ka prinsepe kundi anda ratong kaugalingon. 

Guin hayag man it hari nga ratong guin buligan ni Prinsepe Remus rong matuod nga paindis-indis nga kasapakat it hari. Ro guin pili nga mangin hari hay owa it iba kundi si Prinsepe Remus. /MP