Sugilanon Ni Tita Linda

Pinaka Mahaygang Regalo

Daeayawon ag hueowarang pamilya sanday Felix ag Ana. Sa an-um nanda nga mga unga, ap-at rong nakatapos sa pag eskwela sa colehiyo. Nag-asawa man sanda ag idto naga estar sa Amerika. 

Daywa pa ro owa it asawa. Ogaling ro kamanghuran nga si Nicanor rong problema ko andang ginikanan tungod owa it ganang magtuon. Nangin barumbado ag permeng kaibahan sa gulo. Naga intra pa imaw sa mga sugae bangod bugana sa kwarta halin sa anang mga igmanghod sa Amerika.

Sa dag-unan nga pagpili it “Huwarang Pamilya” hay owa hapili sanday Felix ag Ana bangod eamang kay Nicanor. Guin binasoe ko anang mga igmanghod si Nicanor. 

Owa eon imaw pagpadaehi it sustento. Guin kontra man ni Nicanor ro anang mga igmanghod ag guinikanan hasta nga nag ea-as imaw. Owa eon mag-uli uli sa andang baeay si Nicanor. Umpisa man kato, amat-amat nga nageoya ag nagmasakit ro mag-asawa tungod sa sobrang pagdumdom sa problema nga dueot ko andang onga nga si Nicanor. 

Pag-abot kong Anibersaryo ko andang kasae, nag-uli tanan ro mga unga ag mga apo nanday Felix ag Ana. Si Nicanor eamang ro owa. Idto sa piresuhan imaw. Hadakpan abi imaw nga naga baligya it droga. 

Sa tunga it selebrasyon it Golden Wedding ni Felix ag Ana, may nag-abot nga pulis. May guin dawat nga sobre sa mag-asawa. Ro sueod ko sobre hay papel nga may naka baehag nga isaeang ka tagipusuon nga may sueat, “Nanay, Tatay, Palangga ko kamo. Patawara guid ako. Hueata ninyo ako sa akong paglaya nga isaeang ka bag-ong Nicanor. Malipayon nga anibersaryo, Nicanor.” Mingko tinub-ok sa eangit ro mag-asawa. Rondaya rong pinaka mahaygang Regalo nga andang nabaton. Bangod sa isaeang ka kaeag nga nagtaeang ag nagbalik nga puno it paghinoesoe. Nagbisita rong tanan kay Nicanor ag daea rong abo nga pagkaon. Nagselebrar rong bilog nga piresuhan sa handa kong pamilya. /MP