Sugilanon Ni Tita Linda

Kondesa Lacrima

by Tita Linda Belayro

Ro anang dati nga pangaean hay si Donya Teresa. Ogaling bo-ot nana nga indi imaw malipatan kong tanan. Naka asawa imaw it isaeang ka Konde nga magueang nga baeo ag owa it unga. Pagkamatay it Konde, imaw rong nagpanag-iya it kutob inaywan nga manggad it Konde.

Bo-ot imaw nga magbaeos sa tanan nga nagtuya-tuya kana. Handum nana nga mageuhod man sanda sa anang atubang ag magpangayo it patawad. Naga kalipay imaw kon naga kasubo ag naga kasakit ro anang mga kontra. Kon gabi-e, parabil imaw matueog, guinahuyap nana ro mga tawo nga nagpangayo it patawad ag nageuhod kana. Busa nga guin islan nanda ro anang pangaean ag guin tawag imaw nga Kondesa Lacrima, bangod abo nga eoha it iba ro anang guin patoeo.

Kada agahon, kon mag-agi rong anang karwahe, guina toeok imaw it mataeom ko mga tawo nga may kaakig kana. Ro iba hay nahikaw kana bangud sa anang maeahaeon nga beste ag alahas. Abo nga mga kababayen-an ro naga handum nga mangin kapares nana.

Isaeang adlaw, may natabo nga nagpabag-o kong tanan. Isaeang ka nanay rong nagsu-od kana agod mangayo it bulig para sa anang unga nga naga masakit it cancer. Guintabig ro babaye sa anang aeagyan. Natumba ro babaye ag rong guina koe-koe nga unga. Nagbalik sa anang isipan kat imaw hay maisot pa. 

Guin daea imaw sa ospital. Owa imaw it pangbayad sa pagpabueong ngani owa sanda paginatuha. May naeu-oy nga babaye ag sanda hay guinbuligan. Rondayang babaye hay prinsesa sa rondayon nga kaharian nga ma ila-on mag-bisita sa mga ospital ag baeay ampunan. Pagguwa nanda sa ospital ag pagkasayod nga prinsesa ro nagbulig kana, guin handum nana nga makita ag magpasaeamat.

Tungod naaksidente rong guinasakyan it prinsesa ag imaw hay namatay, owa imaw nakapasaeamat sa prinsesa. Kon owa imaw pagbuligi, hay owa imaw sa anang guina tungtungan makaron. 

Guin eagas nana rong nanay ag guindaea sa ospital rong unga. Imaw ro naggasto kong tanan, bueong, bayad sa doctor ag ospital. 

Nageapta rong balita sa guin obra it kondesa. Abo pa ro nabuligan it Kondesa. Nagpatindog imaw it isaeang ka “foundation” nga nagabulig sa mga masakiton. Nangin bukang bibig rong Lacrima Foundation. Maskin patay eon rong Kondesa, padayon guihapon rong pagbulig it Foundation, bangod tanan ro anang manggad hay guin butang nana sa Lacrima foundation. /MP