Sugilanon Ni Tita Linda

Nagbahoe Sa Bangketa

Ni Tita Linda Belayro

Nagbahoe sa bangketa si Kaloy. Agud makakita it kuwarta, nagabaligya imaw it sigarilyo, tseklet ag mani. Nagapangabuhi imaw nga isaeahanon bangod mabuhay eon nga namatay ro anang ina. Kon amat, una imaw na-agahan sa bangketa, ngani guindunisan imaw nga prinsipe it bangketa. 

Abo nga kilaeang pulis si Kaloy. Sayod man imaw kon sin-o rong mga manakaw, nagabaligya it droga ag mga hold-aper. Ko olihi, guina obra imaw nga “asset” it mga pulis kon may andang guina raid nga sugaean o baeay nga naga baligya it droga. Malipayon imaw kon may madakpan nga mga criminal. 

Bangod perme imaw sa opisina it pulis agod magbaligya it sigarilyo, nangin amigo imaw kong hepe it kapulisan. Guinsampit imaw sa baeay it hepe ag naila-an imaw kong asawa it hepe. 

Guin taw-an imaw it eambong ag tsinelas ag guinpaka-on pa. Agud maka baeos sa mag-asawa, naga bulig imaw it paglimpyo sa opisina ag sa baeay. Ko olihi, guinpatun-an imaw hasta nakatapos it high school. Bu-ot guid nana nga mangin pulis pareho man kay hepe, bosa padayon ro anang pagtipon it kwarta agod makatu-on ag makatapos imaw. Bilang regalo kana ko hepe hay guinpasueod imaw sa anang grupo. Umpisa nga nagtrabaho imaw bilang pulis, abo ro andang guin raid nga mga guinabaligya-an it droga. Abo man nga nabungkag nga mga suga-ean. Kilaea man nana ro mga hari it mga manakaw ag sayod imaw kon siin guina daea ro guina karnap nga mga saeakyan. 

Guin kilaea ro anang didikasyon sa trabaho ag nangin huwaran nga pulis sa andang unit. Pagkataliwan it pilang dag-on, guin padunggan imaw bilang “Huwarang Pulis.” Ro nagkilaea kana ag nag doeot it padungog hay Opisina it Mayor ko andang banwa.

Makaron, una pa guihapon rong tawag kana nga hari it bangketa. Bukon eon it siga sa bangketa kundi imaw rong taga proteksyon it kalinong ag taga bantay kontra sa mga nagaeabag sa batas. /MP