Sugilanon Ni Tita Linda

Alila nga Isda

Ni Tita Linda Belayro

Pagkatapos it baha may nadakpan nga isda si Roper. Maitom ra hitsura, mahaba ro anang ikog. Guin butang nana sa garapon ogaling madasig magbahoe ro isda. Napilitan si Roper nga magbakae it akwaryom. Owa nagakaon it ibis kundi tinuktok nga kamalunggay ag eamhay nga baeatong.

Isaeang gabii, nagdamgo si Roper  nga mangin mabahoe ro anang isda ag maga itlog it perlas. May bilin rong isda nga tagu-on ag bantayan imaw ay basi takawon. Pagbugtaw ni Roper, may nakita imaw nga perlas sa sueod it akwaryom. Guintago nana rong perlas. Adlaw adlaw, nagatiniyo it perlas rong isda. Kat abo eon rong perlas, naghambae rong isda nga buhian imaw sa eawod agod mauli imaw sa anang pamilya. Nagatangis si Roper samtang guina buhian nana rong isda.

Ro mga perlas hay ana nga guin baligya. Nagpatindog imaw it mabahoe nga baeay nga may karinderya sa idaeom. Nakatapos tanan ro anang mga unga. Makaron hay may mga pamilya eon. Padayon pa guihapon sa anang karinderia si Roper. Guin ta-o abi kana ro mga grasya ko isda. /MP