Sugilanon Ni Tita Linda Ni Tita Linda Belayro

Masubo Guid Matuod

Masubo guid matu-od kon akon isipon,

Rong gugmang guinbaeay ag ro akong handum.

Amat-amat duea pati rong kahapon,

Masakit, masubo kon akon dumdumon.

Daw ano kasubo kon akon dumdumon,

Rong mga nagtaliwan naton nga kahapon.

Ilong mga unga nga nangin ulipon,

Mga guinikanan rong dapat basueon.

Masubo matuod kon akon dumdumon,

Katong mga tiempong ako naga tuon.

Nakatapos ako maskin owa’t baeon,

Sa kusog ag bulig ko nanay nakon.

Masubo matuod kon akon isipon,

Nagbahoe ako, nanay sa eoyo nakon.

Si tatay nga dapat inspirasyon namon,

Nag-adto sa Dubai owa eon naka dumdum.

Masubo matuod kon akon isipon,

Mga kabataan owa eon it handum.

Permeng naga inum sa bisyo nagumon,

Ano eon lang baea rong paea-abuton?

Magmukeat kita mga kabataan,

Pageaum kita atong Inang Bayan.

Maskin masubo di naton lipatan,

May naga palangga kitang ginikanan. /MP