Sugilanon Ni Tita Linda Ni Tita Linda Belayro

Ro Pilyong Ueang

Kada tinuga hay may kaugalingon nga pamatasan. May una nga mayad-ayad nga ginapakita ag may una man nga mahugod mag-hangae sa may unang kapintasan. Guina hambae nga uwa it perpekto nga tinuga sa ibabaw it kalibutan. Kon amat mas napan-uhan rong deperensiya it iba ko sa sadya-an nga makita sa isaeang ka tinuga.

Sa idaeom it tubi, may isaeang ka ueang nga mahugod mag hangae sa anang kaibahang ueang. Naanaran eon nana ro paghangae ag indi eon nana mabag-o. Bangod abo rong naapektuhan sa anang paghinagae, abong mga ueang ro nagalikaw kay Peng Ueang.

Isaeang adlaw, samtang naga eangoy-eangoy si Peng Ueang nasipatan nana si Chit Pusit. Umandar eon man ro anang kapilyuhan. Gin sampit nana si Chit Pusit nga mag hampang it taguan.

Owa nakasayod si Chit nga idto sanda nagahampang sa mga korales. Bangod madueom rong mata ni Chit, owa nana napan-uhi nga nakasang-it ro anang mga galamay sa mga korales.  Mabuhay imaw maka hueagpos. Mayad ngani ay may mga isda nga nakatabang kana.  Guin buligan imaw it paeos sa mga korales. Halin kato, owa eon imaw makipag hampang kay Peng Ueang.

Mabuhay man nga owa nakahampang si Peng. Sige ro anang linibot busa hasubeang nana si Bokya nga naga eotaw-eotaw sa tubi.

Ginsampit nana si Bokya nga maghampang. Nagpasugot si Bokya. Sa owa magbuhay, nasum-oe eon kuno imaw it hampang sa tubi. Ngani iba eon man ro andang hampangon. Gin sampit nana si Peng nga magsakay sa lambat. Sadya-an nga mag duyan-duyan sanda sa ibabaw it tubi. Nagsueod sandang daywa. Maangan-angan, nag ea-ong si Bokya nga may boe-on imaw sa idaeom it tubi.

Nabilin si Peng nga sige rong duyan-duyan sa eambat. Ogaling owa eo-ta nakabalik si Bokya. Nabatyagan ni Peng nga naga inalsa rong lambat. Abo nga mga isda rong kaibahan sa sueod it lambat. Hinadlukan imaw. Kat gin bo-bo eon sanda sa banyera, nabati-an nana ro hambae it sangka tawo nga ibalik imaw sa dagat bangod maisot pa kuno imaw ag indi man mapuslan. Duro gid ro kaila ni Peng kat gin haboy imaw sa dagat.

Pag-uli nana sa andang lugar nangayo imaw it patawad sa mga gin hangaean nana eabi gid kay Chit Pusit. Nangayo man it patawad kana si Bokya tongod gin aywan imaw sa lambat.

Nagbalik rong pag aeamigohan kong tanan. Nakatu-on sanda it leksyon nga “Kon uwa ka naila ubrahon kimu hay indi mo pag ubrahon sa iba.” /MP