Sugilanon Ni Tita Linda Ni Tita Linda Belayro

Ro Mapintas Nga Sawa

Tanan ro mga kasapatan sa kagueangan hay mahugod sa pag tinipon it pagkaun agod haum sanda pag-abot it tinguean .

Isaeang adlaw, naabutan kong kuneho nga naga kinato-eog ro sawa.

“Amigong sawa, matsa uwa ka gid nahakat. Kami tanan hay sigi eot-a nga tinipon it pagka-on. Ogaling ikaw hay naga kinato-eog pat-a.” hambae it koneho.

“Ag sin-o ka nga magpadumdum kakon? Bahala tana ako. Sigurado ako nga abu nga pagkaon kon mag-abot rong tag-uean”.  Sabat it sawa ag bumalik eon man sa anang pagkato-eog.

Sumunod nga nakapan-o hay si Bao.

“Amigong sawa, bangon eon ag mag amat-amat it tipon it pagkaon. Indi magbuhay hay tag-uean eon” padumdum man ni Bao.

“Ayaw ngani ninyo ako pagkinulita. Indi matabo nga magutoman ako sa tinguean” sabat man gihapon ni Sawa.

Ag umabot rong tag-uean. Tanan ro mga sapat hay mansig sueod sa andang mga gina estahan. Malinong tanan sanda ag uwa naga kabaeaka sa gutom bangod bastante ro andang tinipon nga pagkaon.

Samtang rong sawa hay amat-amat nga nakabatyag it gutom. Tongod uwa imaw it tinipon, nag adto imaw sa baeay ni kuneho. Nakita nana ro mga nagatumpok nga pagkaon nga tinipon ni Kuneho. Duro gid rong kalipay ni sawa bangod naka paayaw ayaw imaw it pagkaon ugaling nahapit nana ro isaeang ka lata ag nagta-o it sangag. Gulpi nga nahabugtaw rong Kuneho. Hakita nana si sawa nga gina kina-on ro anang pagkaon. Nag singgit imaw ag nagbugtaw tanan ro mga sapat. Nag-adto sanda sa baeay ni Kuneho. Nakita nanda si Sawa busog nga busog ngani gin pulihan kong tanan nga sapat sa kaakig.

Duro guid rong kahuya ni Sawa. Amat-amat imaw nga tumalikud ag uwa eon nagpakita halin kato sa mga kasapatan. /MP