Sugilanon Ni Tita Linda Ni Tita Linda Belayro

Rong Duwende

Sa tunga it isaeang ka hardin nga gina panag-iyahan kong pamilya Real, hay may isaeang ka bungsod sa kilid it hardin. Kada tapos it klase, una naga adto si Kim. Anang gina silhig ro mga nagakataktak nga dahon. May isaeang ka puno it gratilis ma-eapit sa bungsod ag raya ro naga kalhit it dahon sa bungsod. Kada magpanilhig si Kim hay nakikita imaw it duwende. Naila-an nana rong unga bangod naga limpyo sa anang baeay nga bungsod. Agod makabaeos ro duwende hay gina butangan nana it mga prutas ro ibabaw it bungsod. Kon amat may mga hampangan nga nahuman sa mga dahon ag sanga.

Isaeang adlaw, may nakita si Kim nga trompo sa ibabaw it bungsod ag siki it tirador. Nalipay si Kim. Ro anang pag ea-um hay may mga unga nga naga hampang sa bungsod. Ko ulihi hay may mga bueak nga ilahas rong hakita ni Kim.

Pagkasayod ko anang ina, hinadlukan imaw. Busa hay gin pabakasyon anay si Kim sa anang lola sa ibang banwa. Nasubo gid si Kim. Nahidlaw imaw sa anang hardin. Indi imaw hikatoeog ag owa it gana magkaon. Ba-ngod kara, nagmasakit imaw ag gindaea sa ospital agod magtener it sang domingo.

Bangod nag mayad-ayad ro anang pamatyag, ginpauli imaw. Pag-abot sa baeay, hakita nana nga puno it dahon ro bungsod. Ogaling maeoya pa imaw. Ko gabi-i ngaron,  nagdamgo si Kim nga may bisita imaw. Pagbugtaw nana, matuod ro anang damgo. May daeang regalo ag prutas nga may haeogay nga eoy-a. Nag pakilaea nga duwende imaw, naga estar sa bungsod sa may hardin. Nagpasaeamat ro duwende sa pag-limpyo sa anang baeay. Pag-abot ko anang ina, hakita nana rong basket nga may bueak ag eoy-a. Sa anang pag buyot sa eoy-a, hakibot imaw nga rong eoy-a sa basket hay bueawan gali. Halin kato, nagmayad si Kim ag nangin amigo nana rong duwende sa andang hardin./MP