Sugilanon Ni Tita Linda Ni Tita Linda Belayro Regalo Kay Marites

Regalo Kay Marites

Nagbahoe si Marites sa anang lola. Gin aywan imaw ko anang ina nga nagsapalaran sa Saudi. Tongod may hitsura, naka asawa imaw it isaeang ka manggaranon nga Arabo. Mabahoe ro anang ginapadaea kay Marites ag sa anang lola kada tapos it buean.

Ugaling indi magsugot ro Arabo nga mag-uli iya sa Pilipinas. Ro tanan nga padaea ko anang ina hay gina tinipon ko anang lola. Gin regaluhan si Marites it mahaea ko anang lola ag raya hay owa gid nana gina eayuan sa anang pagkatueog.

Nag daeaga is Marites. Sa owa magbuhay, naka asawa imaw it unga it manggaranon man, ugaling uwa imaw naila-i ko ina it anang asawa. Gin obra rong tanan ko ina it eaeaki nga bawi-on ro anang unga kay Marites bangod pobre ro daeaga. Tongod sa Mama’s Boy rong eaeaki, nagmunot imaw sa anang ina paadto sa Amerika. Naaywan si Marites. Tanan ro anang mga palangga hay gin aywan imaw. Pagkataliwan it pilang dag-on, namatay man ro anang lola. Nabilin si Marites nga naga isaeahanon.

Ko gabi-i ngaron samtang naga oeon imaw sa mahaea, mingko may naga hutik kana nga indi magkasubo tongod una kana ro anang lola sa mahaea. Nagbangon imaw ag nangawa imaw nga may mga bilog ro sueod it mahaea. Sa anang pagtabtab, nakita nana rong papelon nga kwarta ag mga antegong alahas ko anang lola.

Pagkaaga, nag adto imaw sa bangko agod ideposito rong kwarta. Nagpatindog imaw it tindahan ag nagtuon it pagka doktora. Nag asenso ro pangabuhi ni Marites. Isaea eon imaw ka doctor it medesina ag may klinika sa kilid ko anang tindahan.

Isaeang adlaw, may pasyente nga nagpa boeong. Owa imaw nakilan-i, ogaling kilaea nana rong pasyente, nanay ko anang asawa. Ginboeong ni Marites. Masunod nga adlaw, may eaki nga naka wheel-chair. Owa man imaw nakilaea ko anang asawa. Naaksidente gali imaw sa Amerika ag nabalda ro anang siki.

Indi eon mapunggan ni Marites ro anang kaugalingon. Nagpakilaea imaw sa anang asawa. Nag-iba sanda ag nangin kabulig nana ro anang asawa ag ina sa anang tindahan. Malipayon eon si Marites. /MP