Sugilanon Ni Tita Linda

Ni Tita Linda Belayro

Ro Bankero

Malisod ro trabaho it bankero. Imaw ro nagadapit ko mga pasahero sa pangpang it suba ag ihatod sa pihak man nga pangpang. Kon tiyempo it tigbaeaha, peligroso ro anang kabuhi. Sa anang mga alima nakasalalay ro kabuhi ko anang mga pasahero. Ogaling maskin malisod ro anang obra, guinatinguha gid nana nga maserbisyuhan ro mga tawo nga nagasalig kana.
Isaeang adlaw, may isaeang ka bag-ong tapos sa pagka abogado nga nagpadapit sa bankero. Ro abogado ngato hay manaba guid ro anang pagtan-aw sa rayang bankero. Naka suksok it amerikana ag naka kurbata pa imaw nga may daeang porpolyo. Samtang nagapanaw ro baroto, naghambae rong abogado, "anong grado ro imong natapos?" pangutana it abogado. "Sir, hasta grade six eamang ro akong haabot", sabat man it bankero. "Ay abaw toto, 25 porsyento ro naduea sa imong kabuhi," hambae it abogado. "May natun-an ka baea hanungod sa siyensya o historya?" dugang nga pangutana pa guihapon ko abogado. "Owa guid ako it nasayuran karon sir, perme abi akong absent sa klase," makaeo-eo-oy nga sabat ko bankero.
Kon mawron hay 50 porsyento eon ro naduea sa imong kabuhi," baeos it abogado. "Hay sa matimatika, kaantiguhan ka?" Ulihi nga pangutana it abogado. "Mas grabe ngani sir sa rikaron. Mahinay guid ako sa numero, busa bankero eon lang ro akong natugpa-an." Mapa-inubuson nga sabat kong bankero. "Kon mawron, mga 25 porsyento eon lang ro habilin sa imong kabuhi," hambae it abogado. Nag init ro dueonggan ko bankero. Sa kaakig ko bankero, tongod sa anang pagpati hay guina insulto imaw ko rayang abogado, pag-abot sa tunga-tunga it suba, golpe nana nga tinikwang ro baroto. Nahueog ro abogado ag nag kapay-kapay nga nagpatabang.
"Sir, kaantiguhan ka baea mag eangoy?" singgit it bankero. "Ay abaw toto, owa guid ako it kalibutan mag-eangoy, tabangi ako," pakitlo-oy it abogado.
"Pasensya sir, may 100 porsyento ko imong kabuhi hay duea eon. Ogaling tongod naeo-oy ako kimo, buligan ta ikaw." Guin dawat nana ro alima it abogado nga naga pangeopsi eon sa kahadluk. Ro anang eawas hay naga kurog pa.
"Abi ko tanan ro kaaeam hay sayod mo, ro simpleng pag-eangoy owa nimo pag tun-i", kampante nga hambae it bankero. "Dumdom nakon experto ka man sa siyensya sa pageangoy," dugang pa ko bankero.
Napahuya ro abo-gado. Indi komo abogado imaw hay tanan ro kaaeam hay hatun-an nana. May mga kaaeam nga guina pa-kanaba naton tongod sa pagpati nga owa raya it relasyon sa atong pro-pisyon. Indi naton pag tuya tuya-on ag paghusgahan ro mga simpleng tawo. /MP