Sugilanon Ni Tita Linda

Ni Tita Linda Belayro

Tatlong Ka Daeaga

May tatlong ka magmaeanghod nga puro babaye. Ro andang kagwapa ag pamatasan hay kaangid gid it adlaw, buean ag bitoon. Parabil mamatay ro andang ina, raya ro guin bilin kanda agod gamiton sa pagpangabuhi. Sa tatlo, ro magueang hay mainiton it oeo, stricto pareho it adlaw. Ro pangaywa, hay maea-mig it oeo, o owa imaw nahakat sa anang palibot, mahipos kapareho it buean. Ro kamanghuran hay malulo, matinahuron ag kaantiguhan magtiis kapareho it bitoon.
Isaeang adlaw, nag eaong ro kada isaea kanda nga magpasimpaead sa ibang lugar. Nagpanaw si Suntaya ag si Luna samtang nagpabilin si Estrellita, ro kamang-huran agod bantayan ro andang pamaeay.
Sa ibang lugar napadpad si Suntaya. Bangud sa mainiton ro anang oeo, permi eang imaw napa impon sa gulo. Ro malisod pa kana hay owa nagapamati sa rason it iba.
Si Luna mat-a, hay naka abot man sa ibanglugar. May hakilaea imaw nga amiga ogaling masyadong mahipos ag owa naila mag impon sa grupo. Bu-ot nana hay imaw eang permi ro taw-an it bagay ogaling owa man nagapasaeamat kon taw-an it pagkaon. Guina baton na eang.
Sa andang baeay, guin atipan ni Estrellita ro andang pamaeay. Guin tamnan nana it hardin ro palibot, nag alila imaw it hayop. Kutob ko naga kinahangean nga tawo, ana nga guina taw-an. May mga tawo nga naila sa anang pamatasan, ngani guina regaluhan man imaw. Abo man nga naga pangasawa kana ogaling owa imaw it napili-an. Nadumduman nana ro anang daywang ka magueang.
Sa sangkurot nga tiyempo, guin usoy nana ro daywang ka magueang nga igmanghud. Idto sa isaeang ka taberna hakita nana ro kamagueangan. Magueang eon ro anang itsura. Imaw ro naga bantay sa mga trabahador sa taberna. Guina kahadlukan imaw kon maakig ngani guin bo-oe nga taga bantay. Nagpakilaea imaw ag nagkilaea sanda nga magmanghod.
Indi pagsugtan ko tag-ana nga maghalin si Suntaya ngani, guin bakae ni Estrellita ro anang kahilwayan agud maka-halin. Guin usoy nanda si Luna. Idto nanda makita si Luna sa lugar it mga masakiton. Maniwang eon ag maeuya. Guin eaong nanda nga daehon si Luna agod ipabueong.
Nag-uli ro tatlo sa andang baeay. Sa anda, bugana sa prutas ag presko ro hangin. Bangud sa kahugod ag kaatag ni Estrellita, owa guina takawa ro andang mga tanum.
Nag pangabuhi ro tatlo nga malipayon. Kon may naga pakalimos ngani, si Luna ro manog ta-o. Kon may naga gulo sa andang lugar, si Suntaya ro guina tawag. Ag kon may naga pangayo it bulig, si Estrellita ro naga atubang. Tongod sa kada isaeang abilidad ag pamatasan, guin simpon nandang tatlo agud mapuslan nga makabulig sa tawo.
Raya ro bilin ko andang ina nga gamiton ro regalo nga guinta-o kanda sa kamaeay-ran ag ro kahinaan it isaea hay paga pun-an it kada isa-ea. /MP