Ni Tita Linda Belayro
Ro Primerong Poinsettia
Sa isaeang ka lugar maeapit sa Bethlehem, ro mga tawo hay guina selebrar nanda ro kapaskwahan paagi sa isaeang ka paeaguwa-on o Christmas presentation. Sa rondayang sangka paguwa, ro mga inunga hay naga haead it regalo sa Niño Jesus sa pagpanguna ko Tatlong Hari. Tanan ro mga onga hay naga preparar. Ro mga guinikanan man ro naga patikasog kara, busa buot guid nanda nga pinakamahae nga regalo ro iga haead ko andang mga onga. Guin eaktan eon it pagpabugae rondayang dag-onan nga selebrasyon.
May isaeang ka pobre nga onga, ilo ra imaw sa ama. Buot man nana nga mag-iba sa mga onga ogaling owa imaw it daeang regalo.
“Siin ro imong regalo?” pangutana kana it sambilog nga onga. Naghipos ag naglingo-lingo ro onga. “Hay ham-an it naga linya ka riya ag owa ka man it regalo?” dugang pa guihapon ko may daeang regalo nga onga. Sige ro paeapit ko mga onga sa pagtao it regalo. Kat maeapit eon lang ro pobre nga onga, nag-eanggi imaw it sangka sanga ko kahoy nga maeapit kana.
Kat ana eon ro turno, eomhod imaw sa Niño ag maghambae, “Sorry Jesus, owa abi ako it regalo kimo kundi raya guid lang”. Guin butang nana ro sanga sa eogta kaibahan ko ibang mga regalo. Sa owa it suko-suko, naghibayag kana ro Niño. Guin buytan ratong sanga ag nagbueak it mapueang mapuea. Tanan ro mga mata hay naka tuon o naga tueok sa ratong bueak.
Hangawa ro tanan. Isaeang ka milagro ro natabo. Ratong regalo ko onga ro pinaka mayad-ayad sa tanan.
Si Jesus, owa naga kinahangean it maea-haeon nga regalo. Bu-ot nana maskin nano basta halin sa tagipusu-on ag guinahaead it may pagpakumbaba. Raya ro guin halinan it primerong tanum nga poinsettia nga naga bueak eamang kada buean it Disyembre.
Sa rayang kapas-kwahan, abrihan naton ro atong tagipusuon agod masueod ro Niño Hesus ag mangin kabahin ko atong pagpangabuhi.
Malipayon nga paskwa ag mabinungahon nga bag-ong dag-on! /MP
No comments:
Post a Comment