Sugilanon Ni Tita Linda

Ni Tita Linda Belayro

Diva Divina

Bata pa si Divina hay hilig eon nana ro pagkanta. Kon owa imaw it klase, naga baligya imaw it kombo nga saging nga eaha ni Nanay na. Kon naga libod imaw it baligya ag samtang naga tus-on imaw it nigo, sige ro anang kinanta. Kon magbakae ngani kana ro anang mga suki, mga traysikol driver, ag mga taga-tindahan hay guina pangayuan imaw it kanta. Parabil matapos ro anang kanta hay ubos eon ro anang kombo, cash ro bayad ag owa it utang.

Isaeang adlaw, may isaeang ka matrona ro nagbakae kana it kombo busa nabatian ko matrona ro ay Divinang limog. Na engganyo ro matrona. Anang guin kangay si Divina sa anda agod ipakilaea sa anang onga nga naga trabaho sa isaeang ka estasyon it radio. Napapati ni Divina rondayang onga it matrona. Guin samitan nanda nga irekord ro anang boses. Bilog nga bilog ag maeamig ro anang boses. Mga pilang kaayad ag pagpino hay haum eong isabak sa mga programa sa television.

Sa pihak nga bahin, ro onga nga daeaga ni Don Ramon Montero hay nag-abot eon iya sa Pilipinas. Si Don Ramon hay sangka kahilapit. Idto imaw magtuon it voice culture sa Amerika. Pag-abot nana iya sa Pilipinas, bu-ot nana nga magpa concerto. Tongod may kwarta, tanan ro facilidad ag pag anunsyo hay guin himo. Abo nga nagtan-aw sa concerto. Isaea eon si Divina ag ro anang talent manager. Nangin idolo ni Divina si Pia Montero, the Singing Diva.

Sa bulig ko anang talent manager, handum man nana nga magpa concerto si Divina, idto man mismo sa lugar nga guin hiwatan ko concerto ni Pia Montero. Sige ro anunsyo ag exposure ni Divina sa radio ag television. Abo ro humanga sa anang boses. Ibang-iba sa tanan ro anang boses, pareho kuno sa reincarnasyon ni Nora Aunor.

Umabot ro adlaw it concerto, Dobleng pilo ro nagtan-aw ikumpara sa concert ni Pia. Ro maila-un magsugae, guin iba nanda ro daywa sa concert bilang isang showdown. Kada isaea kanda hay magpakita ko andang gilas ag ibasi sa paeakpak kon sin-o ro sikat?

Umabot ro adlaw it showdown. Naka daywa pa eang nga kanta si Pia hay sayod eon imaw nga mas lamang kana si Divina. Owa eon magpatapos si Pia. Nag walk-out imaw sa backstage ag umuli nga masubo. Pilang adlaw, bumalik si Pia sa Amerika bangod sa kahuya. Sa owa magbuhay, guin baton ni Divina ro bag-ong pangaean nga Sensational Diva Divina. /MP