Sugilanon Ni Tita Linda

Ni Tita Linda Belayro

Saksi Ro Tuburan Sa Putli 

Nga Paghigugma

Kato anay nga inadlaw suno sa mga katigueangan, may isaeang ka tuburan (waterfalls) sa barangay Mahayhay, sakup it Laguna. Guina pangayaw it mga turista rondayang tuburan. Rikara man naga eaba ag naga paligos ro mga kadaeagahan sa Mahayhay.

Ro manami sa tuburan hay guina halintuead sa belo it nobya kon magtubod paadto sa ubos. 

Ogaling, owa eot-a makaron rondayang tuburan. Kon paalin naduea, hayra ro estora kara. Samtang naga linaba ro mga kadaeagahan ko isaeang agahon ngaron, may nagtaeang nga isaeang ka binatilyo sa tuburan. 

May hakita imaw nga daeaga, si Viola ro anang ngaean. Na ingganyo imaw sa ka anyag it daeaga. Umpisa kato, permi nga naga bisita ro binata sa daeaga hasta nagsumpaan sanda nga maghigugma anan mientras may naga tubod nga tubi sa tuburan. 

Sa owa man magbuhay, may nag abot nga isaeang ka daeaga halin sa syudad. May pagka moderno ro babaye sa tanan nga pag hueag. Ko pilang adlaw, nga nag taliwan sa andang pagkilaea, may sekreto gali nga kaila sa eaeaki. Sa isaeang pagtipon-tipon, guin hilong ko babaye si Medardo. Sa kahilongon, owa imaw kasayod ko anang guin obra. Hasta hakita sanda ko agahon ngaron nga nag eobog kaibahan ko babaye nga parehong hilong. Naakig si Viola kay Medardo. Nag away sanda ag isaeang adlaw, hakita eang ro patay nga eawas ni Viola nga naga eotaw-eotaw sa tuburan. 

Pagkakita ni Medardo, nag eompat imaw sa mataas nga bato ag tumama ro anang oeo sa mataeum nga bato busa na nina, dayon namatay. Pareho sanda nga nag eotaw-eotaw sa tubi hasta naagahon. Pagkaaga, nakita it mga tawo nga owa eot-a it tubi ro tuburan. Maskin owa eot-a ro tuburan, ogaling nangin saksi sa isaeang ka putli nga paghigugma nga hasta makaron una sa tagipusuon ko mga pomoeoyo it mahayhay. /MP