Sugilanon Ni Tita Linda

Amnesya

by Tita Linda Belayro

Samtang naga pamasyar si Prinsesa Betty sa isaeang ka busay, nadumpilas imaw bosa nahueog ag inapok sa liwan it palasyo. Nag-kagulo sa palasyo. Guin inusoy imaw ogaling owa guid makita. Sa uwa magbuhay, guin bilang imaw nga patay.

Inanod sa isaeang ka isla. Naduea-an man it alinto ag guinsapopo ko mag-asawa nga owa man it unga. Bangod owa man hikilaea, guin hingaeanan imaw kay Rhoda. Nagdaeaga imaw ogaling owa pa guihapon magbalik ro anang nakataliwan.

Samtang nagapaha-um imaw ko anang leksyon, nabasahan nana rong historya it isaeang ka kaharian nga may naduea nga prinsesa. May kon anong kusog nga naga tueod kana nga adtunan rondayang kaharian nga sa tabok eamang ko rondayang isla. Sayod ni Princesa Betty rong pasikot sikot ko rondayang palasyo. Bo-ot nana nga sudlon ogaling guin sita imaw it gwardya. Nag-libot imaw ag naka-abot sa idaeum it palasyo. Iya imaw dati nagapalipas it oras pagkatapos it hampang. Nagsueod imaw ag nagderetso sa may piresuhan. May hakita imaw nga guin preso nga mag-asawa. Hakibot imaw kat anang makita nga rong marka ko anang abaga hay kapares man ko marka sa kulentas ko eaeaki. 

Nagpaeapit imaw ag guin pakita nana ro anang marka sa anang abaga. Nagkilaea sanda ag nagpromesa nga pagabuligan nana ro anang ina ag ama. Guinpreso ro anang ama kat nagmasakit sa pagkaduea ko anang unga. Guin eogos rong kaharian ko anang tiyo nga ministro.

Pagkaguwa nana sa piresuhan, nagdiretso si Prinsesa Betty sa ministrong hari. Nagpakilaea imaw nga imaw rong nadueang prinsesa. Owa imaw pagpatihe. Ogaling pagbo-oe nana ko anang balabal ag guin pakita rong escudo it kaharian, tanan ro una sa palasyo hay nagpati. 

Anang guin mandu-an ro mga guwardya nga dakpon rong hari. Nag tuman rong tanan. Guin paguwa rong hari ag reyna agod ipabueong. Nag-uli anay imaw sa andang baeay sa isla ag sueangon rong ina ag ama. Nagbakod rong hari ag reyna. Nagbalik rong mayad nga pagdumaea it hari. Nag balik man ro anang nakataliwan ag imaw rong mabahoe nga kabulig sa palasyo nga naga bantay sa hari ag reyna. /MP