Sugilanon Ni Tita Linda

Alibang-bang Ni Minerva

Ni Tita Linda Belayro

Maisot pa si Minerva hay ma ila-on eun imaw magdakop it mga alibang-bang. Nagbahoe imaw nga mahugop kana ro alibang-bang. Umabot rong oras nga nagmasakit ro anang ina. Sa owa mabuhayi hay namatay. 

Nag-asawa ro anang ama sa isaeang ka baeo man nga may unga sa unang asawa nga ka edad man ni Minerva. Kada agahon, naga adto sa eati si Minerva agod makihampang sa mga alibang-bang. 

Parabil namatay ro ina ni Minerva hay guin bilin imaw sa alibang-bang. Pananglitan hidlawon imaw sa anang ina hay idto nana usuyon sa mga alibang-bang agod mabu-eong ro anang kahidlaw.

Ko isaeang agahun ngaron, guina ga-oy guid nga mayad si Minerva. Ogaling indi magsugot ro mag-ina nga magpahuway imaw bangod guin paeabhan pa kana ro mga kurtina ag kobre kama nga dapat matapos. Guin pilit nana nga matapos ro anang pageaba. Pagkatapos, nag-adto imaw sa eati agod idto magpahuway. Nag-a-eabot ro mga alibang-bang. Guin hapunan imaw ag habatyagan nana ro mga hapeos nga manami hasta imaw hakatueogan. 

Pagbugtaw nana, owa eon it hapdi ro anang eawas. Gabi-e eon imaw nag-abot sa andang baeay. Nakasamit imaw it mueay. Bilang pina kana, owa imaw pagtagan-e it pagkaon. 

Nakatueogan imaw sa kagutom. Agod makalibre sa mga sugo kana, nagpanaw imaw sa eati ag idto nagpa-utwas ko anang kasubo. Maangan-angan, may naghapon nga isaeang ka mabahoe nga alibang-bang. Bali ro anang pakpak. Naeo-oy si Minerva busa anang guin boeong rong pakpak paagi sa pagbutang it laki-laki. Hakatoeugan ro alibang-bang imaw man si Minerva. Pagbugtaw ko daeaga, hakibot imaw ay may haboe eota imaw. Paglingot nana, hakita ni Minerva ro isaeang ka eaeaki nga nakabeste it matsa prinsepe. Pormal ro tindog ko eaeaki nga gina tinueok nana si Minerva. 

Nagpakilaea rong eaeaki nga isaea imaw nga prinsepe sa ibang kaharian. Bangod guinmaldesyon imaw it bruha matapos nga guinbalibaran nana rong onga it bruha. Guin himo imaw nga sangka alibang-bang. Suno sa eaeaki, mabalik eamang imaw sa dating kahimtangan kon may mabuot nga babaye nga makabulig kana. 

Suno sa prinsepe, utang nana kay Minerva ro anang kabuhi. Anang guin daea si Minerva sa anang kaharian. Nangin prinsesa si Minerva ag daea pa guihapon ro anang mga amigong alibang-bang kaibahan eon ko anang kabuhi. /MP