Sugilanon Ni Tita Linda

Pispis Sa Ikatlong Bukid

Ni Tita Linda Belayro

Mabuhay eon rong pagminasakit it hari. Tungod sa anang kaisog it buot, guina daea daea eamang nana ay kinahangean ko mga tawo ro anang bulig. Ko olihi, bangod sa anang kagueang, kinahangean guid nana nga magpahuway eon ag asikasuhon man nana ro anang eawas. 

Guin patawag nana ro anang mga medico ag iba pang seruhano agud matugma ro anang masakit. Tanan sanda hay pareho ro andang tugma. Isaeang ka pispis sa ikatlong bukid eamang rong sarang makabueong sa masakit it hari. Ogaling, malisod boe-on rong nasambit nga pispis, bangod guina bantayan it mga mabangis nga sapat ro kada bukid parabil maabot rong ikatlong bukid.

Guinpatawag rong mahae nga Prinsipe Palermo, solo nga unga it hari. Imaw ro taga iridar it korona. Guin suguid kana rong tanan ag guin paathag man kana rong kapeligrohan nga anang atubadngon. Guin baton it prinsipe rong tanan. Nagpahikas eon ro prinsipe daea rong kompleto nga baeon.

Sa una nga bukid parabil imaw magsaka, may magueang nga nagapatabang sa prinsipe. Owa kuno imaw kakaon it pilang adlaw eon ag indi eon makatikang sa kagutomon. Guintao ko prinsipe ro anang pagkaon. Nagpasaeamat ro magueang ag guin taw-an imaw it puti nga panyo nga pagagamiton kontra sa kaaway. Pagsaka sa bukid ko prinsipe, inatubang man imaw it leon nga naga ngueab. Guin wasiwas nana rong panyo ag golpe nga nageohod rong leon. Imaw man sa ikaywang bukid. Nagpakita rong mabahoe nga oso. Kapares kong na-una, guin wasiwas rong panyo ag golpe man nga nageohod rong oso.

Sa pangatlong bukid, nagpakita rong serpyente nga lima it ueo. Kada tigpas it espada rong sangka ueo, nagabalik man dayon. Nadumduman nana rong puti nga panyo. Anang guin wasiwas sa sawa ro panyo ag nagdongok rong limang ka ueo. 

Guinsaka nana rong pispis nga naga hapon sa sanga it kahoy ag guin putos it panyo. Sa anang pagpanaog, may gwapahon nga babaye rong nag engganyo kana nga magmunot. Nagsunod imaw sa eomay it babaye. Ogaling owa nakasayod ro babaye nga may pangontra eomay man rong pispis. 

Kumanta it sadyaan ro pispis ag nakatoeogan rong babaye. Napierde ro anang eomay ag dali-dali nga nagpauli sa kaharian ro prinsipe. Guin bo-oe rong bueawan nga baeahibo sa idaeum it pakpak ko pispis ag guin tuob sa hari. Nagmayad rong hari ag nagpadayon sa pagserbisyo sa anang kaharian. /MP