Sugilanon

Sakripisyo It Isaeang Ka Ama

ni Tita Linda Belayro

Guinapatihan nga ro mga nanay rong kilaea sa pagsakripisyo. Sa sueod it siyam nga buean, samtang guinadaea daea rong unga sa tiyan, una rong pagtiis, pagpasakit hasta nga matawo ro anang unga. Imaw rong rason kon ham-an nga mas maeapit rong baeatyagon it unga sa anang ina.

Sa bibliya, sa dumaan nga tipan, may isaeang pagsakripisyo kita nga mabasa ha-nungod sa pagsakripisyo ni Abraham sa anang unga nga si Isaac, bangod sa anang hugot nga pagtuo sa Diyos.

Mabuhay nga naka unga rong mag-asawang Abraham ag Sarah. Haeos ona sa kagueangan eon ag nag-abot rong mabuhay eon nanda nga handum. Mas malipayon si Sarah bangod nabawi nana rong pagkutya nga imaw hay baog ag isaeang ka mabahoe nga kakueangan sa mga kababayen-an idto sa lugar nanday Sarah ro pagiging baog. Nagbahoe si Isaac nga puno it pagpalangga ko anang ina ag ama. Nangin matutom imaw sa pagbulig sa anang ama ag masinueundon sa anang guinikanan.

Isaeang adlaw, guintawag imaw ko anang ama. Maadto sanda sa bukid it Moriah agod maghaead it sakripisyo. Nag-usoy imaw it mga kahoy ag nagpahikas eon sanda paadto sa guintaea-na nga pagasakripisyuhan. Guin kamada ni Isaac rong kahoy o gatong sa ibabaw it altar. Owa guid imaw magpangutana sa anang ama kon siin rong hayop nga igadu-eot bilang sakripisyo. Guingapos ro alima ni Isaac ag guinpaeobog imaw sa guinkamada nga gatong. 

Kat guina hana nga ibuno ni Abraham rong kutsilyo sa anang unga, gulping may anghel nga nagpakita. Anang guinpapundo ro pagbuno ni Abraham. Natungkad kong Diyos rong hantup nga pagtuo nga haum nana nga isakripisyo ro anang bugtong nga unga, mapakita eamang ro anang pagsunod sa Diyos. 

Guin hubad ni Abraham rong gapos ni Isaac. Paglingot nana sa tuo it altar, may nakita imaw nga tiyo it karnero nga nakapu-eopot sa mga baeagon. Guin bo-oe nana rong karnero ag imaw rong guin himo nga sakripisyo. Nag-uli ro mag-ama ag padayon si Isaac sa pagbulig sa anang guinikanan hasta imaw nga nagbahoe. /MP