Sugilanon Ni Tita Linda

Guin Pinta Nga Retrato

Ni Tita Linda Belayro

May isaeang ka manggaranon nga negosyante nga ma-ilaon magbakae it mga guin pinta ko mga sikat nga pintor. Abo ro anang koleksyon. 

Ro anang solong unga hay nagsueod sa pagka soldado nga kung siin may nakilaea imaw nga sangka soldado man ag nag-amigo sanda. Sa andang pakikipag-away sa andang mga kaaway, namatay rong solong unga it negosyante. Ana abing guin eowas ro anang amigo bosa inigo imaw it bala ko pagbaril ko andang kuntra.

Nasubo ro anang ama. Naduea-an imaw it kalipay bangod ko pagtaliwan ko anang solong unga. Nagpundo it pagbakae it mga pinta. Nagtaliwan ro mga dinag-on, nagbisita rong tatay ko ratong soldado nga guin salbar ko unga it negosyante. May daea imaw nga retrato nga guinpinta. Rondaya nga retrato hay nakita nana sa pitaka ko anang unga nga makaron hay may pamilya eon.

Guin pakamayad ko negosyante nga ibaligya rong tanan nga guinpinta nga retrato paagi sa pagsubasta. Kaibahan sa guina subasta hay rong retrato ko anang unga. Umabot rong adlaw it pagsubasta. Abo nga mga manggaranon nga ma-ilaon man sa guin pinta nga retrato ro nag-aeagto sa adlaw it pagsubasta.

Naghambae ro manugsubasta nga unahon anay rong pagsubasta sa retrato ko anang unga. Owa guid it nag-ayo. Bu-ot nanda ratong mga obra-maestra it sikat nga mga pintor.

May isaeang ka dati anay nga hardinero it negosyante nga nagtambong sa pagsubasta. Mabuot kana rondayang unga kat una pa imaw nagatrabaho. Agod may ana nga handumanan sa ratong unga, imaw ro nag-ayo sa pinakamanaba nga presyo bangod owa man imaw it abong kwarta. 

Guin hibaygan imaw. Ro abogado nga nagapatigayon sa pagsubasta hay may guinbukad nga papel. Nakasa-ad sa papel nga kon sin-o rong makabakae kong retrato ko anang unga, imaw ro magapanag iya ko tanan nga guin pinta nga kwadro.

Nakibot rong tanan. Indi sanda makapati, ogaling alinon hay tapos eot-a ro pagsubasta. Guin daea ko hardinero rong tanan nga guin pinta. Owa masayri kon guin baligya nana ratong mga obra maestro. /MP