Bato Bantiling
Ni Tita Linda Belayro
Guina tawag nga Bato Bantiling si Mang Ador sa andang lugar, sa Brgy. Mulawin. Imaw ro tawo nga indi matibag-tibag sa kahadluk o sa kangawa. Owa man imaw nagabat-yag it kaeo-oy eabi guid sa mga kubos ag guina ihig. Owa man naila mag adto sa mga lugar nga abo it mga pobre ag masakiton.
Nag-asawa ro iba nanang unga sa tawo nga owa nana naila-i. Bosa indi nana mapatawad. Imaw rong masunod sa andang baeay ag tanan hay nagaeohod kana parabil mapa hinuhod.
Isaeang adlaw, namatay ro anang ina. Sa adlaw sa paghatod sa ulihing paeahuwayan, owa guid imaw nakipag eobong. May guina huptan abi imaw nga kaakig sa anang ina ag ama halin pa sa pagka unga kana. Naghinguha imaw hasta nakapanaw sa Davao. Idto imaw nakaasawa it manggaranon nga unga it tag-iya it panaderia.
Nangin trabahador imaw. Bangod pobre, hay guina mata-mata imaw ko anang manggaranon nga panugangan. Owa imaw nagustuhi ko anang panugangan ogaling nailaan mat-a imaw ko anang asawa.
Nagea-as sanda ag idto nag-estar sa isaeang ka lugar it mga skwater. Nagtinguha sanda hasta nakatipon it kwarta. Tag may anda eong hatipon, nagumpisa it pagpatindog it panaderia. Halin kato, naduea ro anang pagsalig sa anang isigkatawo. Nangin Bato Bantiling ro anang tagipusuon. Bo-ot nana nga mangin manggaranun agod makabaeos sa anang panugangan.
Makaron, una eon sanda sa anda nga lugar sa Brgy. Mulawin daea rong dumot. Nagmasakit ro anang unga nga babaye. Kinahangean rong dugo bangod may masakit nga leukemia. Bukon it pareho ro andang dugo ko anang unga. Nag inusoy sanda it tawo nga may parehong dugo ko anang unga.
May isaeang ka pobre nga eaeaki ro nag donar ko anang dugo tungod mabuot mat-a kuno ro anang unga.
Nagmayad ro anang unga. Guina bayaran ni Mang Ador ro eaeaki. Owa imaw pagbatoni it bayad. Naantig rong anang tagipusuon. Indi gali tanan hay sueok it kwarta. May mga tawo pa gali nga may mabueawanon it tagipusuon.
Amat-amat nga nag-humok rong Bato Bantiling nga tagipusuon ni Mang Ador. Pagdaeaga ko anang unga, nag asawa sanda ko ratong eaeaking nagdonar it dugo. Owa eon nakabalibad si Mang Ador. Ro anang umagad rong naga dumaea ko anang panaderia tungod magueang eon imaw. /MP
No comments:
Post a Comment