GROL Maga Rally Vs GSIS

Picture above shows government employees and GSIS pensioners, including the man in the wheelchair, queuing to activate their e-Cards in the GSIS machine in the Aklan Capitol building. This long line is a daily occurence.

Ro Government Retirees Organization of Libacao (GROL), Inc. hay maga rally agud ipahayag ro andang baeatyagon hanongod sa pag pinilit it Government Service Insurance System (GSIS) sa mga naga obra sa gobyerno ag mga pensionado nga osahon ro “e – Card” sa tanan nga transaksiyon sa GSIS.
Sono kay Dr. Ambrosio R. Villorente, pangueo it GROL, ro rally hay gin kasugtanan nanda sa andang regular quarterly meeting ko Hunyo 29 sa Libacao, Aklan ag pagahiwatun sa atubang it Capitolyo Provincial, Estancia, Kalibo sa alas nueve y medya (9:30) it agahon hasta alas doce (12:00), Lunes, Hulyo 9, 2007.
Ro rally hay paga adtunan ag intrahan it mga GSIS pensioners halin sa Libacao, Aklan ag mga dinapit nga visita agud maga pahayag sa rayang saeot nga GSIS e-Card. Himpit nga gina kangay man ro mga GSIS pensioners halin sa mga ibang banwa, ro andang mga igbata ag eabi-eabi man ro mga empleyado sa atong gobiyerno nga mag-tambong sa rayang rally ag causa it mga magueang nga mabuhay, sincero, dedicado ag tapat nga nag servicio sa atong gobyerno.
Raya ro mga paga hambaean:
1. “No e-Card, No Pension” policy it GSIS nga naga dueot it hapdi sa mga tawo eabi gid sa mga magueang imbes nga maka tao it comfort;
2. Ro pag deposito it GSIS pension fund sa Union Bank nga owa man it bisan sanka sanga sa Akean, Antique, Capiz ag Guimaras, kundi sulong maisot nga sanga sa Iloilo City;
3. Ro pagbalik it dating pagbayad it GSIS pension cheki nga gina padaea sa cada pensionado paagi sa post office;
4. Ro pagpahalin it cuarta it GSIS nga naka ag gina deposito sa Union Bank pa adto sa bangko it gobiyerno; ag
5. Ro paghinyo nga batonon ro resignation ni Mr. Winston Garcia ag baylohan imaw it mabuot ag naka intyendi ko minatuod nga sitwasyon sa mga provincia bilang chairman ag chief executive officer it GSIS.
Rayang e-Card hay bukon it tama ag bagay nga usahon it senior citizens. Una, owa man it Union Bank sa Aklan; ikaywa, cada sang withdraw sa ibang bangko hay may P12 nga bayad ag P3.00 cada pangutana; ika tatlo, agud mag adto sa bangko, mabahoe ro gastos halin sa residencia pareho it Libacao pa Kalibo ag pauli sa Libacao; ag ika ap-at, madueum ro mata, naga kurug ro tuhod ag tudlo sa paggamit it ATM.
Ham an it idto gid ni Mr. Winston Garcia igdeposito ro cuarta’t GSIS sa Union Bank nga owa man ngani it mga it sanga sa mga provincia ag siudad? Bangud baea nga ro 49 percent shares of stock hay ana it Aboitiz Group of Companies? Owa ngani ga deposito sa Union Bank ro SSS nga may ana man nga 27 percent of Shares of Stock.
Ro poder hay concentrated sa Garcia family it Cebu. Ro ama ni Mr. Winston Garcia nga si Pablo Garcia hay congressman it 5th District of Cebu, si Pablo John Garcia, unga ni Pablo ag igmanghud ni Winston hay congressman man it 2nd District of Cebu. Ro onga ni Pablo ag igmanghud ni Winston ag Pablo John nga si Gwendolyn Garcia hay governador it Cebu. Bu-ot pa ni Cong. Pablo Garcia nga mangin Speaker it House of Representatives.
Masyadong delicado nga ibutang sa sangka familya ro mabahoe nga poder.
Gin bati-bati ngani nga maga haead si Mr. Winston Garcia it tig P200,000 cash halin sa GSIS sa first termer congressman nga maga boto sa anang ama nga si Cong. Pablo Garcia sa pagka speaker. Sa mga second third termer, P300,000 mat–a ro offer.
Gina kangay ro mga Senior Citizens ag ro iba pang interesado nga magbuylog sa rayang matarong nga kausa. /MP