Sugilanon Ni Tita Linda

Ni Tita Linda Belayro

Paskwa It Mga Pispis

Kada mag abot ro paskwa, guina puno ni Valerie ro tueok-an it mga pispis idto sa mata-as nga baeay-baeay nahamtang sa sanga it punong kahoy. Maila-on abi mag alila it pispis si Valerie. Parabil mag abot ro paskwa, guina limpyohan eon nana ro tanan nga baeay-baeay ag guina butangan it malimpyo man nga tubi ro ilimnan. 

Ko isaeang agahon, may isaeang ka pispis nga puti una eot-a sa ubos it baeay-baeay ni Valerie. Indi maka eopad busa sa ubos eon lang imaw tumugpa. Pagka dipara ni Valerie, dali-dali nga guin daea sa andang baeay ro pispis, guin bueong ag guin patuka. Nagmayad ro pispis pagtaliwan it pilang adlaw. Ogaling naduea it hinali pagtaliwan it pilang adlaw. 

Samtang naga tatap sa ibang pispis si Valerie, may nagpundo nga itom nga saeakyan sa atubang ko anang baeay. Nanaog ro isaeang ka gwapuhon nga eaeaki. Nagpakilaea kay Valerie nga si Prinsipe Umberto imaw. Nagpasaeamat imaw kay Valerie tongod imaw ro naka bungkag ko sumpa it bruha nga nag maldisyon kana.

Ro bruha hay naila gali sa prinsipe ogaling owa kana naila ro prinsipe. Sa pagkaakig ko bruha, guin sumpa nana nga mangin pispis ro prinsipe ag maga balik eamang sa anang dating dagway kon may mabuot ag putli nga babaye ro makabueong kana. Guin bali dayon ko bruha ro pakpak it pispis. Sa anang pag-linopad, nakaabot imaw sa lugar ni Valerie. Sa pagkaduea ko sumpa, nagbalik ro tanan nga dagway ko mga dama, gwardiya ag alalay it prinsipe nga kutob sa nagsunod kana. 

Pagtaliwan it pilang dominggo, nasaksihan ro engrandeng kasaean sa lugar nanday Valerie. Pareho it isaeang ka paraiso ro baeay ni Valerie. Guin patindugan it abong baeay-baeay it pispis ro palibot ag may fountain pa sa tunga it hardin. 

Kada magbakasyon ro pamilya ni Valerie, una naga hampang ro anang mga unga nga prinsipe ag prinsesa sa andang lugar. /MP