Sugilanon Ni Tita Linda

Ni Tita Linda Belayro

Itom Nga Linaw

Si Mang Venancio hay isaeang ka mangingisda. Ko adlaw ngaron sa anang pag pangisda, owa guid imaw it dakop maskin maisot eonlang nga ibis. Sige ro anang pagbinugsay agod mag usoy it mahueogan it eambat hasta nakaabot imaw sa itom nga linaw nga owa nana napan-uhi. Habatyagan nana nga mingko may naga higop kana nga pwersa pa idaeom. Naduea-an imaw it pangalibutan. Sa anang pag muk-eat, bukon it mahayag ro panan-awan. Madueom. Pulos itom ro anang hakita pati ro mga tanum hay itom ro mga bueak ag dahon, maskin ro mga isda hay puro itom man. 

May nag abi-abi kana nga isaeang ka eaeaki. Imaw ro prinsipe ko kaharian sa idauem it dagat. Guin dueotan imaw it pagkaon ogaling owa imaw magkaon. 

Hadumdoman nana ro bilin ko anang ama nga indi magbaton it pagkaon kon sa iba kang lugar nga bukon mo it kabisado. Maangan-angan, may habati-an sanda nga daguhob. Nag paeanago ro mga isda ag nagdungok ro mga tanum. Nag abot gali ro andang hari nga si Haring Neptuno. Mainit ro anang ueo tongod puro saeabton ro guina ta-o kana ko mga tawo sa ibabaw. Naeo-oy si Mang Venancio. Naghaead imaw it serbisyo sa hari nga magmasahe ko anang ueo. Nagpasugot ro hari. Hakatoeogan ro hari ag naglinong ro palibot. Halin kato imaw eon ro naga masahe ag nagahilot kay Haring Neptuno kon mainit ro anang ueo. 

Mahaba eon ro oras nga nagtaliwan. Nahidlaw eon imaw sa anang pamilya. Busa, nag eaong imaw sa hari. Guin sugtan man imaw ag sa anang pag uli, guin pabaeonan pa imaw it mga perlas. Nag manggaranon si Mang Venancio. Abo nga nahikaw kana ag bu-ot man nanda nga mangin kapares kay Mang Venancio nga nagmanggad halin sa idaeom it dagat. Abo ro nagpahatod kay Mang Venancio sa linaw. Pag abot sa nasambit nga lugar, guin bilinan sanda nga maghueat kon ano ro matabo. Nagbalik sa takas si Mang Venancio. 

Naghumbak it mabaskog ag naeonod ro mga tawo hasta hakatoeogan. Sa andang pagbugtaw, idto eon sanda sa kaharian ni Haring Neptuno. Sayod ro hari kon ano ro andang panaw. Guin pan-an sanda it hari. Guin palimpyo ag nagpanilhig. Puro mga perlas ro andang guina silhig. Ro bilin kanda hay tipunon ro mga perlas ag ibutang sa sueodlan. Ogaling guin pinang tago nanda ro perlas. Ko gabi-i ngaron, nagkasugot sanda nga mag paeayo sa palasyo. Ogaling owa pa ngani sanda naka guwa hay naglinog it mabaskog ag nag alimbukad ro eawod. 

Nag gueowa ro tanan nga higko ag nag itom ro palibot nga puno it eapok. Indi sanda maka ginhawa tongod sa mapilit ro tubi. Nagkaeamatay sanda. Nag kalhit ro mga perlas. Halin kato, nag itom ro tubi ag bihira ro mga tawo nga naga pangisda tongod owa man it abo nga isda nga naga estar kara sa linaw. /MP